ORANJESTAD (AAN) – Den e ciclo di reunionnan cu ta tumando lugar, entre Formador Evelyn Wever-Croes y e stakeholders den cuadro di formacion di un Gabinete nobo, tambe un encuentro cu Iglesianan Cristian Aruba a tuma lugar.
Pastor Frank Daal, den conferencia di prensa, a duna su punto di bista tocante e reunion aki cu Formador Wever-Croes.
Pastor Daal a expresa cu nan ta hopi gradici cu e invitacion, pa asina por a vocifera e asuntonan cu ta biba entre e Iglesianan Cristian Aruba.
El a splica cu nan ta un constelacion di 47 diferente Iglesia, di diferente denominacion. Asuntonan cu nan ta considera importante pa Formador ta, por ehemplo, efecto di e pandemia na Aruba, y con e constelacion aki ta trata cu esaki y con el a wordo afecta, y tambe trainingnan cu nan a organiza pa yuda den e situacion. “Nos a papia tambe di e debe nacional excesivo, violencia domestico, abuso di mucha, entre otro. Nos tabata tin un momento tambe pa papia tocante educacion en general y di husticia den e sociedad”, Pastor Daal a menciona.
El a agrega cu door cu nan ta topa hende tur dia, nan ta haya hopi situacion cu e constelacion Cristian aki a formula den un carta pa Formador, pa e tene cierto aspectonan na cuenta, vooral den e tereno social.
“Nos tin un crisis social aki na Aruba cu a bira awo peor cu e pandemia, tambe e situacion di salud menta a djis bira mas fuerte y akinan ta unda nos a combersa un rato y wak con nos como Iglesianan Cristian Aruba ta deal cu esakinan”, Pastor Daal a subraya.
Pastor Daal a señala tambe cu nan a mira den esaki un oportunidad pa e hendenan bay bek den e norma y balornan puro, sano y di mes saca for di e palabra di Dios.
“Esaki a pone nos para keto un rato riba bida y cuminza aprecia e cosnan importante, manera comunion. Tin otro dilanti di otro y no ta asina hopi riba social media y e tipo di cosnan asina aki. Y tambe midi si hopi trahamento, compara cu e pureza di un matrimonio, e famia, por pone tur esaki den balansa” Pastor Daal a bisa.
Pastor Daal a subraya cu e reunion cu Formador a bay hopi bon.
