Pastoor in spe Steve Geerman ta hopi orguyoso cu restauracion di Kapel di Bethania

ORANJESTAD (AAN): Pastoor in spe Steve Geerman, presidente di Fundacion Kapel di Bethania,

a expresa su satisfaccion y orguyo cu e progreso di e trabaonan di renovacion y restauracion di Kapel di Bethania na Noord.

   Geerman a splica cu ta aproximadamente cinco aña pasa Fundacion Kapel di Bethania a cuminsa traha y busca manera pa por duna uzo atrobe na e edificio historico. Awor, despues di un proceso largo, e fundacion ta mira cu e kapel ta wordo restaura y ta bolbe recupera su gloria di antes.

   "Mi ta hopi contento y hopi orguyoso di mira cu, desde cinco aña pasa cu Fundacion Kapel di Bethania a cuminsa traha, por fin nos a logra renova y restaura e kapel y pone bek den su gloria manera e tabata antes," Geerman a expresa. E trabaonan ainda no a termina. Segun Geerman, e siguiente fase lo inclui e resto di e edificio, mientras cu Fundacion Kapel di Bethania ta sigui traha pa duna tanto e kapel como e edificio un proposito nobo cu lo contribui na bienestar di pueblo di Aruba. Geerman a destaca cu e importancia di Kapel di Bethania ta bay mas leu cu comunidad di Noord. E estilo arquitectonico di e kapel ta unico na Aruba y, segun dje, esaki ta duna e edificio un balor monumental cu merece di wordo conserva pa futuro.

   El a expresa su gratitud na Gobierno di Aruba, tanto e gobierno anterior como e gobierno actual, pa a reconoce y sostene e mision y vision di Fundacion Kapel di Bethania. Tambe el a reconoce e apoyo di Monumentenbureau, cu desde inicio a acompaña e proceso y a yuda cu e aspectonan monumental di e edificio, incluyendo e reconocimento di su interior como parti di su balor monumental.

   Geerman a gradici tambe e parokianan di Noord, e comunidad y diferente famianan y personanan cu durante añanan a contribui na diferente manera pa haci e restauracion posibel. Pa Fundacion Kapel di Bethania, e progreso actual ta representa un paso importante pa conserva un pida unico di patrimonio historico di Aruba y, na mes momento, prepara e sitio pa un funcion nobo cu por sigui sirbi comunidad den futuro.