For di mi pesebre di ayera e mihor deseonan pa un bon Pasco, Aruba!
*Solo ta sali na cielo di Aruba pa e alegria di Pasco por alcansa tur hende
ORANJESTAD (AAN) — Na e momentonan cu e articulo aki ta wordo skirbi, falta tres dia mas pa Aruba uni den e alegria di Pasco, e fiesta di speransa nobo.
E hende ta central Pasco, e fiesta Cristian cu ta recorda cu Verbo di Dios a encarna y a bira hende. Esaki ta nifica pues cu ora papia di hende, ta papia di algo mas cu di e obheto di produccion; e fuente di creacion di placa of otro base pa un pais funcion.
Pasco ta hiba nos na e esencia, cu ora papia di hende, ta papia di e motibo cu tin mundo y universo cu mester sirbi e hende, e Yiu di Dios, Kende a identifica su mes cu hende.
Con e realidad di celebracion di Pasco ta refleha su mes na Aruba na 2023?
Un pregunta cu nos mester haci nos mes, si nos ta biba na 2023 den un mundo auto destructor, cu diariamente mas y mas ta deshaci di siguransanan basico cu hende ta busca pa por biba trankil.
Ta masha bunita cu den tur comunidad na mundo, hende ta bisa cu Dios ta cu nos. Pero con cada pais ta cumpli cu e Boluntad di Dios, cu a conduci na e celebracion di Pasco di Nacemento, cu mester hiba nos na Pasco Grandi, ora hasta ta celebra cu ni morto, por pone fin na hende pero ta bira porta pa su felicidad eterno?
Pasco sigur ta un momento pa Cristiannan analisa, si e Gobierno di e pais tin motibo pa invita e Pueblo pa celebra Pasco, Fiesta di e Luz pa Mundo, e Luz pa tur hende!
Nos leynan ta prohibi mezcla religion y politica, cu ta algo cu nos ta sostene completamente.
Pero ora Pasco bati na porta, hende mester puntra su mes si su comportacion personal, su familia, su ambiente, su gobernacion ta coresponde na e esencia di Pasco of no.
E situacion economico y financiero di e pais, ta crea un base social den cual prueba ta wordo duna cu e hende ta central? Den esaki nos no ta papia di comunismo, cu sigur nos no ta apoya, pero nos ta papia di e gobernacion cu mester percura pa e hende ta feliz den un comunidad cu ta capaz pa percura pa esaki?
Na final di 2023, den un mundo di hamber, dolor y destruccion continuo di hende, na Aruba bon gobernacion a percura pa un base, cu ta crea trabou, ta crea pan, ta crea oportunidadnan pa tur hende por busca nan felicidad y hiba un bida cu ta defende e balor di hende.
Na mes momento nos mester tira bista riba e otro parti di felicidad di hende. Informacionnan di DIARIO ta papia di e atencion creciente di Husticia pa sigura bienestar di muchanan cu ta victima di hende sin concenshi cu no por tuma e palabra Pasco den nan boca como agresor, violador, destructor di bida humano.
Sentencianan mas pisa ta confirma e balor di hende cu mester wordo respeta for di su nacemento te su morto.
Presentacion di gobernantenan di Aruba ta mustra riba leynan y ampliacion di expertonan cu mester haci husticia pa tur hende posibel y cu mester evita cu muchanan ta bira victima di Herodes, cu awe ta bibo den practicanan di abuso di droga, abuso di sentido di poder, abuso di forsa fisico contra otro.
Sentencianan cu ta wordo pronuncia den mayoria di caso, basa riba loke Ministerio Publico ta pidi, ta duna proteccion na e balor di hende for di momento cu e nace te e momento cu e mester despedi di mundo.
Na final di 2023, un bon maneho financiero ta resulta den mas asistencia pa esnan cu no por percura pa nan mes y den cual ancianonan ta destaca.
Awe rond mundo luz di Pasco ta cende. Pero con e hende ta sinti su mes? Manera e Niño Hesus den brasa di su mama riba un burico pa e no wordo mata dor di envidia?
Con e mucha ta sinti su mes? E por compara su mes cu e mucha cu lo a crece den e cas na Nazareth pa por cumpli cu su mision final?
Kico ta e balornan basico, e moral di un comunidad, cu mester resplandece husticia?
Luz di Pasco ta cende na Aruba, un pais bendiciona cu un bon gobernacion cu ta alivia e peso di esun sin cama cu mester drumi den pesebre. Un pais di paz y trankilidad y un pais sin hamber y miseria y den cual por reina alegria.
Elevacion social pa medio di Leynan cu ta brinda asistencia ta mantene economia, cu ta permiti Arubianonan comparti cu otro.
Ta den un ambiente di solo cu ta sali pa hende, yena cu alegria, Aruba por cende e luz di Pasco.
Bon Pasco Aruba, pais bendiciona!
