Algun di nan a drumi pafo riba mesa di Snackbar na Aeropuerto
- E ‘abandono’ aki a cuminza plama den prensa internacional
ORANJESTAD (AAN): A bin sali na claridad awor, cu e capacidad di e avion di British Airways Boeing 777-200 cu a keda stagna Diadomingo anochi na Aruba, tin capacidad di 336 pasahero. Y via prensa internacional a cuminza drenta informacion cu e pasaheronan aki no a keda nada contento con e aerolinea y nan groundhandler a trata nan e anochi y marduga ey.
Vuelo BA-2156 tabata planea pa sali Diadomingo anochi pa 7:00 pm for di Aruba, pa dirigi su mes pa Aeropuerto di St. John’s na isla di Antigua. Awor a sali na cla cu e pasaheronan tur tabata abordo di e avion caba. Pero ora cu 7:00 pm a bati, pasaheronan a nota cu e avion ta keto bay na Aruba y no ta subi. E ora ey nan a wordo informa cu lo tin un retraso di 90 minuut, y nan por a keda abordo. Aparentemente esey ta pa haci coreccion na e problema tecnico.
Asina nan a keda sinta den avion, y oranan a cuminza pasa. A yega 8:00 pm, sigui pa 9:00 pm. Na diferente ocasion via speaker ta informa e pasaheronan riba loke ta pasando. A yega 10:00 pm y sigui pa 11:00 pm.
Finalmente el a culmina pa 12:20 am, ora cu nan a anuncia cu e dificultad tecnico di e Boeing 777 no por wordo drecha, y tur hende ta obliga di baha di e avion.
Aeropuerto di Aruba ta cera banda di 1:00 am, y e momento ey ya caba no tabatin mas vuelo, y pesey no tin trahador mes mas den diferente area. Pasaheronan a wordo forza pa baha di e avion y bay recoge nan maletanan bek sin ningun asistencia di e aerolinea.
“Mi no por kere cu nan a haci nada pa asisti nos. Esaki ta inaceptabel,” ta loke un pasahero a keha mientras nan ta mira con e personal di cabina si a sali di Aeropuerto rumbo pa nan Van cu a busca y hiba nan pa nan acomodacion.
E situacion tabata uno dificil pa e pasaheronan cu a cumpra Data-Plan pa traha cune na Aruba, pero esakinan a caduca riba Diadomingo cu nan tabata planea pa bandona e isla, pues nan no por a ni haci yamada cu nan smartphone.
Pa colmo, a bin haya sa cu Hotelnan tur ta yen debi na High-Season, y esey a pone cu algun pasahero no tabatin ningun otro escogencia, esta di drumi abao riba suelo paden di Aeropuerto, riba stoelnan.
Otronan a busca stoelnan pafo di Aeropuerto, e.o. rond di e snackbar conoci como Café Abraço cu ta net dilanti entrada di Inmigracion Non-USA Departures pero ta cera e momento ey. Pero e no tabata un marduga facil, como cu temperatura tabata di como 24º Celsius, cu hopi biento, y tin biaha tabatin yobida tambe.
Te banda di 2:00 am, nan a ricibi email di British Airways, cu a ser manda pa tur pasahero afecta, indicando na ingles: “We sincerely apologise for the unprecedented and extended delay onboard today. This was due to a technical issue identified with the aircraft prior to departure, which our engineers were unable to resolve in time to operate the flight. Safety is our highest priority, and we would never operate a flight unless it is safe to do so.”
Den e email, e aerolinea a priminti tambe cu nan team di Customer Relations lo bay drenta den contacto dentro di 48 ora y a ofrece pa automaticamente rebook tur vuelo connecting pa e pasaheronan afecta.
Mientras cu e website di British Airways a indica cu pasaheronan por aplica pa haya pago pa tur gasto cu nan a haci riba Diadomingo anochi y Dialuna mainta, hopi di e pasaheronan ta puntra ki tempo of con compensacion lo bay yega na nan.
Vuelo te Dialuna anochi: Finalmente e reparacion a wordo haci na e Boeing 777 cu a keda henter dia riba plataforma di Aeropuerto. Finalmente tur pasahero a haya informacion, cu nan vuelo lo sigui, y esaki lo socede Dialuna anochi pa 8:45 pm.
Hopi di nan no a logra drumi Dialuna marduga ni mainta. Hopi zonza nan a drenta avion banda di 8:15 pm sperando di por bay haya sikiera chens di drumi abordo. Pero ora cu 8:45 pm a yega, e avion no a lanta. Aki atrobe a bolbe sufri un retraso chikito.
Finalmente pa 9:32 pm, e Boeing 777 di British Airways cu riba di 300 pico pasahero a lanta vuelo, pa bula e ruta di Aruba pa Antigua den 90 minuut. Unavez cu yega 11:00 pm na Antigua, a usa un otro Boeing 777-200 di British Airways pa hiba tur e pasaheronan di transito fo’i Aruba pa sigui pa Inglatera.
Esey a sali pa 12:39 am riba Diamars marduga for di Antigua pa un vuelo di casi 8 ora largo, unda sigur nan tur lo a probecha pa drumi y colecta bek e soño cu nan a perde na Aruba. Nan a yega Londres Gatwick Airport banda di 12:30 pm riba Diamars merdia.
