ORANJESTAD (AAN): Awe (Diaranson) merdia pa 1:30 pm, Hues di Corte den Promer Instancia,
lo dicta sentencia den e caso Flamingo. Manera a publica, un Hues cu no ta di Aruba, a bin trata e caso pa asina mustra imparcialidad di Corte di Husticia den caso penal contra politico.
Aña pasa November 2024, a cuminsa cu tratamento di e caso Flamingo cu a caba te algun dia promer cu eleccion na December 2024. Hues a palabra cu 21 Januari 2025 e ta sera tratamento di e caso y 22 Januari 2025, e ta dicta sentencia.
Aña pasa, e dos Fiscalnan di Ministerio Publico a bisa Hues cu nan ta haya cu den e caso aki por mira con corupcion ta tuma lugar. Esaki ta alarmante. Esser y Otmar a hiba politica pa yuda otronan cu a yuda den campaña. Esaki no ta politica sino corupcion. Fiscal ta haya cu mester manda un señal bon cla den comunidad cu no ta permiti abuso di funcion.
Fiscal ta haya Jeandrick culpabel di malversacion door di tuma Tiel y lag’e traha. El a exigi un multa di 25 mil Florin of 1 aña sera den prison. Tambe Fiscal a exigi 180 ora di trabao pa comunidad y si no haci esaki e lo mester bay 90 dia sera.
Fiscal ta haya cu Phillips a gana 100 mil Florin di Gobierno door di no traha. El a exigi 6 luna di prison pa Phillips.
Fiscal ta haya cu Wever a abusa di su funcion y a falsifica cartanan. Fiscal a exigi 240 ora di trabao pa comunidad y si no hacie, Wever mester bay 120 dia sera. Tambe Fiscal a exigi 6 luna di prison condicional cu 3 aña di prueba.
Fiscal ta haya cu Esser tabata e persona di confianza di Otmar. El a exigi 18 luna di prison pa Esser.
Fiscal ta haya cu Otmar Oduber tabata e minister cu a abusa di su poder. Fiscal a exigi 3 aña di prison y pa 6 aña largo Otmar no por postula su mes como politico.
Awe ta haya sa si Hues ta haya Otmar Oduber culpabel of no. Si Hues condena Otmar Oduber, kico esaki lo nifica pa Otmar su carera politico awor y den futuro.
