Pasa tempo liber den naturalesa cu nos muchanan

ORANJESTAD (AAN): Hungamento pafo den aire liber ta hopi importante pa muchanan.

E ta yuda crea confiansa propio den un mucha. E manera di hunga pafo ta menos structura cu hungamento paden. Ta existi maneranan infinito pa un mucha por explora pafo, sea den cura di cas, den un parke, den mondi of band’i lama. Dunando e mucha e libertad pa hunga den un lugar sigur cu supervision ta dun’e e poder pa controla su mesun accion, empoderando e mucha. 

Den añanan 80, un biologo Edward O. Wilson na Harvard University a propone e teoria yama biofilia: Nos instincto como ser humano ta atrai na naturalesa y medio ambiente cu ta rondona nos. Pero awendia hopi mayor lo cuestiona e teoria aki, mirando cu muchanan hopi biaha tin e preferencia pa sinta dilanti un screen en bes di pasa tempo hungando pafo. Ademas, un otro factor cu ta hunga un rol ta e miedo di mayornan pa locual ta riesgonan di hungamento pafo: manera peliger di parti trafico of chens pa e mucha bini den contacto cu personanan indesea. 

Beneficionan di hunga pafo 

Estudionan recien ta mustra diferente beneficio ora muchanan y adultonan pasa tempo pafo. Muchanan cu ta pasa tempo pafo hungando ta mas sabi, contento, atento y menos ansioso cu muchanan cu ta pasa mas tempo paden den cas. 

• Hungamento pafo ta promove creatividad y imaginacion. Dunando un mucha e espacio pa hunga den un manera liber pafo ta duna e mucha e oportunidad pa pensa liber, crea nan mesun actividad y weganan, siñando e mucha con pa acerca e mundo den un manera mas inventivo.
• Muchanan ta siña responsabilidad pasando tempo pafo. Nan lo siña cu mata y bestianan ta muri ora nan wordo descuida. Asina muchanan por siña con pa cuida e medio ambiente. Tambe nan por siña cuida tur loke ta di nan, cordando ariba nan pertenencianan cu nan a sali cu nan di cas.
• Pasando tempo pafo ta promove stimulacion. Aunke naturalesa ta mustra mas trankilo, e ta activa mas di nos sentidonan. Muchanan ta mira diferente tipo di mata, tende un variedad di bestia, hole y mishi diferente obhetonan den naturalesa.
• Pasa tempo pafo ta saludabel. Sea ta hungamento, core bais of aunke ta solamente canamento, muchanan ta move y ta reduci stress. Esaki ta importante pa nan salud, por laga nan focus miho y nan lo drumi anochi miho.
• Hungamento pafo pasando tempo den naturalesa ta haci muchanan mas curioso. Esaki lo pone nan pensa y puntra preguntanan tocante naturalesa y e mundo rond di nan. 

Na Aruba tin diferente sitionan pa hiba muchanan pasa tempo liber pafo den naturalesa. Algun idea ta encera: 

• Cana den mondi hunto como famia.
• Bishita sitionan den naturalesa manera Ayo y Casibari.
• Probecha di e beachnan di Aruba.
• Bishita parkenan di recreo manera parke curason y Neptali park.
• Cana, core bais, rollerskate a lo largo di linear park. 

E solo por ta fuerte y por bira calor, ta recomenda pa bay mainta of mas parti atardi. Semper tene na cuenta cu e muchanan. No lubida awa, sunblock, pechi y algo di come. 

Sea un bon ehempel pa bo yiunan y pasa tempo liber como famia den e bunita naturalesa cu nos tin na Aruba. 

Fuente: https://childmind.org/article/why-kids-need-to-spend-time-in-nature/

Pa informacion of pregunta por acerca Fundacion Pa Nos Muchanan - Cumana 2