Reunion den Parlamento
*Esaki ta e di tantisimo reunion regardando pobreza
*Atrobe ta tira culpa riba tur gobernacionnan di pasado
ORANJESTAD (AAN): Dialuna mainta, Parlamento a trata e Costo di Bida di e isla, cual reunion a ser yama pa e fraccion di AVP. Un tiki di lamenta cu mayoria Parlamentario di AVP a briya cu nan ausencia.
Miembronan di Parlamento a haci nan preguntanan na Gobierno y di parti di Minister encarga cu finansa publico, Xiomara Maduro a percura pa splica na placa chikito kico tur ta worde haci pa stabilisa e situacion financiero di nos Pais Aruba. Segun Ministro, esaki sigur despues cu Mike Eman a hiba un maneho financiero descabeya cu a debilita e fundamento riba cual e isla Aruba mester por a crece y conoce progreso. Durante e gobernacion di Mike Eman, e gastonan di interes a subi grandemente cu mas di 100 miyon Florin a consecuencia di e debe gigantesco di 2200 miyon Florin cu Mike Eman a traha sin 'give a damm' cu Pueblo den apenas 8 aña. Mas di esey por lesa na pagina 5.
Partido AVP a trece dilanti, cu tin informacion cu tin un pobresa emergente cu mas di 50 mil persona bibando baou di e entrada minimo. Nan ta bisa cu di Augustus 2022 nan a pidi pa Prome Ministro bay Parlamento pa discuti aumento di costo di bida.
Segun AVP, e cifra di 50 mil persona riba e isla ta entre esunnan mas vulnerabel pasobra no ta alcansa e Bestaansminimum manera ta calcula pa Oficina Central di Estadistica. Den e grupo aki ta cay, no solamente esunnan cu ta ricibi un bijstand, esunnan cu ta cobra pension, pero tambe e mayoria di e pueblo trahado. AVP ta bisa cu e ta un pobresa penoso loke mas di 50 mil ciudadano ta pasando aden; un situacion cu a cuminsa desde 2017 y cifra ta marca claramente cu esey ta e momento cu cosnan a cuminsa cambia den e pais aki pa pio.
Diferente Parlamentario den oposicion a trece dilanti e preocupacionnan cu ta biba na Aruba. Siendo cu si bo mira e economia di Aruba, e no ta uno cu tin motibo pa tin pobreza. A ser mustra cu AVP ta pidi reunion pa discuti e asunto di pobreza, pero no ta ofrece solucion.
Hecho ta cu esaki no ta prome biaha cu ta trata e asunto di ‘pobreza’ den Parlamento. Partido Accion21 a presenta algun solucion pa cu esaki. Partido MAS a indica cu pa hopi aña caba, e isla mester a siña tur aspecto di e pobreza aki y mester por sa kico pa haci pa cambia. Nos por sigui hiba un maneho unda reparticion ta inhusto den pueblo y hopi hende pasa den situacion hopi penoso.
Tabatin decisionnan robez cu a tuma lugar den Gobiernonan anterior, y cu a rekeri curashi pa bin cu cierto cambio.
