Partido MEP ta felicita Aruba cu firmamento entre WEB y Eagle LNG

ORANJESTAD (AAN):  Diahuebs 9 di December 2021 tabata un dia grandi pa Aruba. E firmamento entre WEB y Eagle LNG a tuma luga den curason di San Nicolas,

e ciudad den cual Eagle LNG lo establece su mes. Mester bisa cu mas di 10 aña pasa WEB a cuminsa cu tramite pa bay over riba LNG. Awor porfin e ta bay bira realidad. E acuerdo aki tin multiple beneficio:

- Aruba lo transiciona pa un energia mas limpi, pa por cumpli cu e acuerdo di Paris, di acuerdo cu e vision di energia di Aruba aproba pa tur stakeholder local, y manera partidonan MEP y RAIZ a acorda den e acuerdo di Gobernacion “Aruba mester di nos tur”;

- prijs di awa y coriente mas stabil y lo no depende mas di e prijsnan volatil di Heavy Fuel Oil;

- y principalmente Eagle LNG lo crea un desaroyo economico nobo, especialmente na San Nicolas y lo crea cupo di trabou industrial, algo cu ta hopi necesario aki na Aruba.

Ademas mester remarca cu inversionnan pa bay den e direccion di LNG a cuminsa algun aña pasa, na momento cu WEB a inverti den motornan di Wartzila. Esaki ta conclui e proceso di transicion di tecnologia y inversionnan ya haci.

            Uzo di LNG pa genera energia, no ta e energia di mas limpi cu tin, pero pa un periodo di transicion, e ta mucho mas miho pa nos medio ambiente. Mundialmente LNG ta wordo uza como un transicion pa un tipo di energia mas limpi y duradero, entre otro hydrogen. Gobierno di Aruba lo explora e posibilidadnan den e direccion aki.

Pa diferente motibo esaki ta hopi importante, entre otro pasobra esaki ta e caminda di menos dependencia di Hulanda.

            Pa por a yega asina leu, State Department di Merca a hunga un papel importante. Esaki despues di e bishita di trabou cu Premier Evelyn Wever-Croes a haci na Under Secretary of State Na april 2019, caminda a explora desaroyo economico nobo pa Aruba y di parti di Gobierno di Merca a compromete di yuda Aruba den busca desaroyo. Gobierno Mericano ta sostene e proyecto aki y a yuda Gobierno di Aruba den e procedura di screening, cu a bay den tur transparencia 

DUDA DEN E PROYECTO

            No ta tur hende ta convenci di tur e beneficionan aki, of talves tin hende cu kier mira otro desaroyo. Esaki ta algo cu ta pasa semper y nos ta respeta esaki, y nos lo haci tur lo posibel pa elimina cualkier duda. Pasobra e proceso encamina tabata uno transparente. Pa prome biaha a aplica e proceso di destaho publico segun standard di World Trade Organization, cu un comision di seleccion totalmente independiente y a duna transparencia total den e proceso. Si mester duna mas transparencia, nos lo duna mas transparencia. 

PROGRESO Y BIENESTAR

            E acto simbolico di firmamento lo acelera e desaroyo cu Aruba henter mester awor, pa trece progreso y bienestar pa tur ciudadano, cuminsando cu San Nicolas, pero tambe pa henter Aruba. Nos no por warda mas. E momento pa desaroyo pa Aruba y pa San Nicolas, ta awor!

Pabien Aruba!