ORANJESTAD (AAN): Lider di MEP señora Evelyn Wever-Croes, den nomber di Partido MEP ta invita tur ciudadano cu tin mester di ayudo pa yena nan formulario di Impuesto 2022,
pa tuma contacto cu Partido pa asina traha un cita pa yena nan formulario di Impuesto. Partido MEP ya pa 14 aña consecutivo ta yuda nos ciudadanonan yena nan formulario di Inkomsten Belasting na CEDE di MEP.
FECHA PA YENA FORMULARIO NA CEDE DI MEP:
E fechanan pa luna di augustus ta: diamars 29 y diahuebs 31.
E fechanan pa luna di September ta: diasabra 2, diamars 5, diahuebs 7, diasabra 9, diamars 12, diahuebs 14 y diasabra 16.
Orarionan lo ta: Diamars y diahuebs, parti mainta 9:00 am pa 12:00 pm y parti atardi 6:00-9:00 pm. Diasabra 9:00 am pa 1:00 pm.
HACI CITA:
Mescos cu ultimo añanan, e biaha aki tambe e proceso lo bay solamente cu cita. Por haci un cita na number 660-2837 desde dialuna 14 di augustus for di dialuna pa diabierna, di 9'or am pa 12'or pm. y di 1'or pa 5'or pm.
Tur ciudadano cu tin cita lo wordo atendi mesora riba nan fecha y ningun formulario ta keda atras na CEDE di MEP, pasobra ta trata di informacion confidencial, y no por core riesgo cu nan ta perde.
DOCUMENTONAN:
Pa por yena e formulario ta importante pa bo tin comprobante y documentonan necesario entre esakinan ta: Loonopgaaf 2022 SVB, Loonopgaaf 2022 APFA, Loonopgaaf 2022 di Lago Annuity Foundation. Carta di interes di prestamo di banconan. Carta di interes y gastonan di hypotheek. Carta di interes di Credit Card.
Finalmente si tin yiunan ta studia den exterior, mester inclui comprobante di inscripcion di e yiu na e scol den exterior.
“Pues busca bo documentonan y keda pendiente. Augustus 29, na CEDE di MEP nos ta spera bo pa yuda bo un biaha mas. Manera semper mi ta recorda ciudadanonan, paga impuesto ta deber di nos tur, pero no paga di mas impuesto. Yena bo formulario y entreg’e na tempo”, Lider di MEP, señora Evelyn Wever-Croes a expresa.
