ORANJESTAD (AAN): E opinion di AVP ta cla y raspa: Contratistanan chiquito cu entradanan margina y eherciendo trabaonan ehemplar merece un mihor trato y un entrada husto y completo.
Esey ta loke AVP a bisa tambe durante reunion di Parlamento riba presupuesto di DOW.
Fraccion di AVP a presenta un mocion pa urgi gobierno pa mas liher posibel duna atencion na e preocupacionnan di e contratistanan chiquito y corigi e decisionnan aki cu ta perhudicando e contratistanan chiquito.
AVP a indica cu nan mocion a sali na defensa di e contratistanan chiquito cu contract di servicio cu DOW, Serlimar y Santa Rosa cu pa hopi aña ta haciendo un trabao grandi y importante di limpieza y mantencion rond di nos isla. Ta trata di mantencion di e bunitesa di nos flora, barionan y centronan di ciudad y trabaonan adicional pa cual tanto DOW, Serlimar y Santa Rosa ta utiliza nan servicio.
E mocion ta referi cu compensacion y condicionnan di trabao di contratistanan chiquito ultimamente a conoce medidanan severo di Gabinete Wever Croes cu a afecta nan den un forma cu a perhudica nan nivel di entrada severamente, condicionnan di trabao y tambe nan seguridad di entrada mes.
AVP a duna detayes di unda tur Gabinete Wever Croes a corta den e compensacion di e contratistanan chiquito. Ademas di corta den nan entrada y compensacion e acumulacion di medidanan imponi tin un impacto directo ariba e costo di bida di e famia di e contratista chiquito, mescos cu den comunidad. Tambe e gastonan operacional diario di e contratistanan chiquito ta worde confronta cu aumento severo di gastonan inevitabel pa por brinda servicio mientras cu e compensacion ta worde corta.
Segun AVP, riba tur esaki awor ta bin aumento di prijs di awa y coriente cu 30%, paga pa remedi y aumento di BBO cu lo haci BBO en total 21% riba mayoria producto na Aruba.
E mocion cu fraccion di AVP a presenta pa urgi gobierno pa mas liher posibel duna atencion na e preocupacionnan di e contratistanan chiquito y corigi e decisionnan aki cu ta perhudicando e contratistanan chiquito, lamentablemente a worde rechasa door di coalicion MEP/RAIZ. Eman ta bisa cu lo sigui hiba e lucha, pasobra locual Gabinete Wever Croes ta haciendo cu e contratistanan chiquito ta hopi inhusto.
Ademas di a corta den nan entrada y compensacion pa gastonan di operación nan tin cu biba tambe cu e aumento dramatico di costo di bida y di materiaal cu ta afecta nan gastonan familiar y gastonan di operacion.
