Edward Maduro di SADA
ORANJESTAD (AAN): Edward Maduro, presidente di sindicato SADA, a elabora riba e loke den su opinion ta un maneho iresponsable cu Gobierno a introduci siman pasa relaciona cu overtime pa empleadonan publico. Fuera cu nan no ta di acuerdo cu e manera cu a introduci e maneho, e contenido di e maneho ta mas iresponsable ainda.
Maduro a enfatiza cu nan intencion no ta pa bringa pa overtime of ta pro overtime. Traha overtime ta pasobra e empleado tin un deber pa cumpli cu ne, specialmente den cierto dienst, cu tin minimale bezetting mester cumpli cu ne, kiermen cu tin ora e empleado ta haya su mes obliga di traha overtime. Loke nan ta contra ta e maneho di Gobierno, cu nan medidanan iresponsabel, cu ta conduci na overtime riba un nivel basta halto.
E maneho nobo di Gobierno a wordo firma dia 14 di September ultimo y mester a drenta na vigor dia 15 di September. Pero riba 15 di September den oranan di merdia, e departamentonan a haya e decreto den nan poder y asina por a comparti cu nan empleadonan. Den opinion di Maduro, e tipo di maneho aki mester wordo delibera, specialmente ora ta trata di e tipo di decisionnan aki. Tuma e decisionnan sin acerca sindicatonan ta iresponsabel.
Maduro a indica cu Gobierno ta hunga cu sentimento di e empleadonan publico, pasobra nan a cuminsa na bisa cu ya cu nan a duna bek 5% di salario, pa via di e decision aki, mester corta riba overtime. Ta berdad cu empleadonan publico a cuminsa haya e 5%, pero esaki tabata den presupuesto pa e aña aki, cu ta na 18 miyon. Gobierno por a paga e 5% di Januari caba, pero a dicidi di paga bek te na mita di aña. Pesey nan no ta compronde con Gobierno ta introduci maneho riba overtime pasobra no tin placa pa por cubri e 5%.
Maduro ta lamenta e manera di proceder di Gobierno, y a indica cu tin cierto discrepancia den maneho di presupuesto y awo ta bin cu excuus cu no por paga overtime pasobra mester paga e 5% bek.
