Partido AVP a reuni riba puntonan di prioridad pa Gobierno nobo di 2025-2028  

Dialogo ta e tono y meta...

ORANJESTAD (AAN): Diadomingo partido AVP a tene un seminario cu tur su candidatonan y algun consehero, pa prepara pa e reunionnan pa forma gobierno cu partido FUTURO.

   Den e simannan cu ta bin ta spera cu e dos partidonan lo sinta hunto pa papia mas extenso riba e contenido di e maneho riba tur tereno di gobernacion. Esaki lo mester culmina den un programa di gobernacion pa e periodo 2025-2028. Den preparacion pa esaki, partido AVP a tene un seminario riba diadomingo.

   Den e seminario a trata diferente tema cu ta importante pa forma un gobierno solido, cu un programa di gobernacion y prioridadnan den maneho cu ta refleha e pensamento di tur dos partner den e coalicion.

   Principionan como guia y inspriracion: Den e prome parti di e seminario a dedica tempo na compronde bon e principionan di Christian Democrasia, su ideologia social y con esaki ta guia escohencianan politico.

   E agenda di AVP pa un desaroyo social economico mas balansa pa Aruba, no ta un casualidad. Banda di e ideologia social christian, e realidad social-economico cu e caida enorme di forsa di compra di un parti grandi di nos comunidad, cu ta bon describi den diferente raport y enveztigacion di institutonan aki na Aruba mes y e necesidad di un maneho pa un Aruba mas sostenibel a largo plazo, ta e motibonan pa e escohencianan di AVP pa un maneho social y economico di renobacion structural.

   Analysis y comparacion: E di dos parti di e seminario di AVP tabata dedica na studia y compronde bon e programanan di tur dos partido FUTURO y AVP. E comparacion di e dos programanan y e otro documentonan di AVP, manera e “raamwet” pa futuro maneho y desaroyo di Aruba, tabata central.

   E pensamento ta cu pa Bo tin un bon dialogo entre AVP y FUTURO tur candidato y consehero mester compronde e dos programanan, e pensamento nan tras y e prioridadnan di cada partido bon. Mester sa unda e programanan y prioridadnan ta mes cos, unda nan ta complementa otro y unda tin necesidad pa mas splicacion.

   E ehercicio aki tabata masha fructifero y a yuda tur participante compronde e pensamento tras di e programanan di AVP y FUTURO miho. E forma di acerca e trahamento di un programa di gobernacion door di studia y compronde e contenido di e programa di e dos partnernan aki, ta mustra e seriedad cu cual AVP ta atende e proceso di formacion. Remarcabel tabata e accento cu a pone riba ‘dialogo’ como e forma pa yega na e programa final cu tur dos partido por sostene completamente.

   Otro siman ta spera di por cuminsa cu e reunionnan riba contenido di un programa di gobernacion pa e periodo di 2025-2028.