Participante di Miss Universe a mustra con cirugia a daña su cara completo

SANTIAGO: E participante pa Miss Universe 2018, e dama venezolano-chileno Andrea Diaz, kende ta modelo y periodista, a mustra awor via social media cu un procedimento cosmetico cu el a bay haci, no a sali manera el a spera.

   Miss Universe ta e certamen di beyeza mas importante na mundo, y e reinanan ta haci tur nan esfuerzo y ta traha duro pa logra gana e corona.  Hopi ta tuma dieta of ta haci demasiado ehercicio pa logra un apariencia desea.  Sinembargo, tin cu ta prefera di bay na un Docter di Cirugia Plastico.

   Andrea Diaz a nace na Venezuela y for di chikito a muda pa Chie.  Mientras cu tempo a pasa, y su amor pa tur dos pais, el a dicidi na obtene dobla nacionalidad.  Na e certamen di Miss Universe 2018, e tabata representante di Chile.

   E tempo ey, durante entrevistanan pa e certamen, Andrea a confesa cu e ta sinti hopi feliz di representa Chile.  “E ta e pais cu a mirami crece y hopi aña pasa a ricibi mi cu brazanan habri,” el a yega di comenta.

   E dama a sorprende tur televidente cu su beyeza increible, pasobra e tabatin un cara bunita y un curpa yen di curvia cu ta yama atencion.

   Den e certamen tambe el a revela cu algun aña prome el a haci un cirugia estetico cu a lage cu varios quemadura riba su cara.  “Mi a bay pa algo rutinario pero mi a regresa cas tur devasta, cu mi cara kima cu acido.   Claro cu asina tur mi soñonan a cay den otro,” Andrea a corda durante Miss Universe.  Ademas, e tabata sinti cu ningun pais lo no kier pa nan worde representa pa un mucha muher cu cara kima.

   Debi na e mal trabao ey, Andrea a keda casi un aña y mey cu miedo di sali di su cas, ya cu el a sufri un dolor grandi cu e no tabata sinti sigur di su mes.  Pero cu tempo, su heridanan a cuminza cura y el a haya confianza bek.

   Aunke e no a sali ganadora di Miss Universe, e ta bisa cu esey tabata un di e momentonan mas feliz di su bida.