Parokia Birgen di Fatima a haci Mama Maria feliz

ORANJESTAD (AAN): Dialuna net riba e fecha cu Iglesia Catolico ta celebra e fiesta di e Santonan Francisco y Jacinta Marto,

Parokia Birgen di Fatima a uni na e di 5 Rosario Mundial organiza pa Mater Fatima y FRICYDIM (Famia Religioso di e Curason Inmaculada y Divina Misericordia) pa inocencia di tur e muchanan di mundo.

   E celebracion a inicia cu un Santo Sacrificio di Misa caminda a presenta e muchanan na Hesus atraves di e Curason Inmaculado di Maria, cu e meta pa cultiva, defende y preserva nan inocencia den mundo. Durante e Santo Sacrificio di Misa, concelebra pa Rev. Pastoor Jan Gospodarczyk, Rev. Pastoor Jozef Pelc y Rev. Diacono Michael Nicolaas a bendiciona tur e muchanan presente. E hobennan tambe tabata tin un luga special durante henter e celebracion di Misa y tambe a ricibi e bendicion special.

   Despues di e Santo Sacrificio di Misa a sigui cu Adoracion durante cual e Santo Rosario a worde resa door di un representante di; Scol Amplio nos Cosecha, Hardin di Rosa pa Mama Maria, Famianan, Comunidad Totus Tuus y Lazos de Amor Mariano pa e siguiente intencionnan:

   Combersion di pecador, paz na mundo y triunfo di e Curason Inmaculada di Maria.  E famianan, nucleo di nos comunidad y cuna di vocacionnan. Santo Papa y su Mision di guia Iglesia Catolico y renobacion di Consagracion di Rusia. Misioneronan, cu e candela di Spirito Santo hiba nan evangelisa den tur skina di mundo.

   Tur presente cu tabata desea por a Consagra na Hesus atravez di Maria. Na final tur presente a worde bendiciona cu Santisimo.

   E celebracion a worde anima door di Koor Amigonan di Hesus y Maria. Rev. Pastoor Jozef Pelc y Rev. Diacono Michael Nicolaas ta gradici tur e gruponan di Parokia, parokianonan y tur e fielnan catolico cu a acepta e invitacion pa uni na e di 5 Rosario Mundial y haci Mama Maria Feliz!