ORANJESTAD (AAN) -- Parlamentario Marco Berlis, di fraccion di MEP, a hiba palabra Diaranzon mainta durante nan conferencia di prensa, unda el a toca temanan manera Presupuesto 2022,
reunionnan cu ta bay tuma lugar otro siman, Eagle LNG y algun desaroyo cu ta tumando lugar na Merca tocante gas natural, unda Merca ta trahando duro riba pipanan extra pa asegura exportacion di gas. Tambe el a menciona cu gas natural ta hopi mas limpi y miho pa nos clima. Finalmente, a referi na un retorica di señor Mike Eman tocante pobreza y AZV, entre otro.
Marco Berlis a menciona cu e siman aki Parlamento tabata bastante ocupa, vooral e fraccion di MEP, cu lesamento di presupuesto 2022, haciendo preguntanan critico tocante diferente aspecto, manera e parti di maneho, gastamento di placa.
Berlis a bisa cu manera ta conoci, tin e Landspakket y COHO, cu reglanan hopi estricto. Riba presupuesto mes, exigencianan pa corta na diferente caminda, ta hacie mas dificil pa maneha un pais, y pa inverti tambe den locual gobierno lo kier haci.
Berlis a bisa cu, naturalmente, como parlamentario nan a repasa tur e material y ta preparando nan mes pa e debatenan, y tambe pa haci e preguntanan necesario na e mandatarionan, segun e dianan pasa.
Segun Berlis por a compronde e reunionnan aki ta bay tuma lugar otro siman, y nan ta expect cu esaki lo bay sosode for di mainta pa anochi, y cu cada dia dos minister lo bin, pa asina aki e parlamentarionan por trece nan puntonan dilanti, y scucha tambe nan contestacion riba e preguntanan aki.
E parlamentario a subraya cu e presupuesto 2022 ta laat entrega, pero e ta spera cu pa loke ta 2023 esaki por wordo entrega na tempo, segun ley ta stipula. El a agrega cu e presupuesto 2022 a haya diferente cambio, cu hopi reto, cu poco di e parlamentarionan tin experiencia den esaki, pa tur locual a sosode durante e ultimo añanan cu e pandemia, y diferente reto economico tambe exigencianan di CAft.
E parlamentario a menciona cu fraccion di MEP sigur ta bezig ta na expectativa di e reunion publico di presupuesto pa asina aki, cuminza debati riba dje, pasobra e ta algo sumamente importante pa Aruba, y pa Parlamento haya sa kico ta bay wordo haci y kico no, den e añanan nos dilanti.
