Fracaso proyecto Citgo a duna prueba di peliger di credito iresponsabel --- *Credito demasiado halto ta causante di problemanan social serio --- *Proyecto Citgo a crea un ilusion cu a bira desastre pa hopi ciudadano
ORANJESTAD(AAN)- Na 2016 Aruba a baila. Pueblo di Aruba a wordo prepara pa e momento cu economia di Aruba lo a crece cu 15 porciento, loke lo a nifica un bida di abundancia pa Pueblo.
Mientras doño di Citgo, Nicolas Maduro, mester a hipoteca Citgo pa Venezuela no bay bancarota na 2016 pues ora tabata firma e Acuerdo pa Citgo, un grupo grandi di ciudadano na Aruba a cuminsa adapta nan mes na un futuro den cual placa lo no tabata problema.
Na 2017, Aruba a alcansa un punto mucho mas serio cu hopi bez a wordo splica den publicacionnan pero a bini dilanti, ora nos mester a cuminsa prepara Aruba pa e realidad cu Citgo tabata un fantasma manera mundo a adverti.
Tabata tin un motibo cu hopi Arubiano tabata sumamente preocupa cu futuro na 2017, loke a bini dilanti tambe den e resultadonan di eleccion 2017 durante cual Aruba a bira lomba pa Gobierno di Mike Eman.
No tabata solamente e hecho cu Hulanda a yega, cu e debe nacional a bira conoci mescos cu e placa cu Aruba mester paga por lo pronto pa e proyectonan PPS.
Na 2017, bida a tranca na Aruba ora a bira conoci cu proyecto Citgo tabata na peligro.
Den tur sector suspenso grandi a bati na porta. Instancianan oficial no por a presenta cifranan y pronosticonan pa futuro.
E sentido di inseguridad tabata serio pa un grupo di Arubiano, cu den silencio a conoce e pio momentonan di nan bida durante 2017 y 2018.
Tabata trata di personanan cu a haci debe a base di e informacionnan cu nan tabata ricibi cu tabata bisa cu Aruba tabata na entrada di un epoca di oro.
Den combersacionnan confidencial nos a wordo informa di hende cu a cuminsa prepara nan mes pa e momento cu na 2018 Citgo lo a habri su porta y a cuminsa haci gasto pa nan paga despues.
Nan a sigui e ehempel di Gobierno Mike Eman pa haci gasto y paga despues sin realisa kico tabata dilanti porta,
Na 2018 pa evita Aruba di drenta estado di bancarota, Gobierno Evelyn Wever-Croes cu yudansa di Hulanda mester a cuminsa introduci medida.
Pero no tabata e medidanan aki so, cu a causa tanto problema social na Aruba. Tabata e peso di tanto debe cu a pasa e forsa di personanan cu a haci debe pasobra nan a kere cu di berdad Aruba lo a conoce un crecemento economico di 15 porciento, cu nunca a bira realidad.
E berdad di Aruba tabata cu salarionan a bira menos pasobra mester a cuminsa paga debe di Aruba mientras cu Citgo a despedi manera mester a spera for di 2016.
E problemanan social cu a surgi tabata enorme pero a bira pio na 2020 ora Covid-19 a bati na porta.
Mientras e malesa tabata plama, nos tabata tin contacto cu Arubianonan cu no tabata prepara pa esaki tampoco. Arubianonan cu a puntra nan mes con nan ta pone placa riba mesa pa paganan nan debe di auto, di hipoteca, etc.
Ora Covid-19 a cera economia di Aruba, sector bancario a yuda crea un fase transitorio.
Te awe un grupo grandi na Aruba ta victima di debe nacional pero tambe debe personal cu nan no por a carga pero cu nan a pone riba nan lomba pasobra nan a spera loke tabata fantasia prome cu e Coronavirus nobo a ataca.
Awe mundo ta den mas suspenso cu e situacion di guera, cu manera DIARIO a splica lo afecta comunidad mundial.
E maneho cu Gobierno pa medio di Ministro Geoffrey Wever a presenta pa pone fin na debe cu hende no por carga, ta di aplaudi.
E pasonan legal cu a wordo trata den Parlamento pa evita cu debe ta bira menasa social di hende na Aruba, ta duna di responsabilidad gubernamental cu ta necesario manera nos contactonan cu Pueblo na momentonan sumamente dramatico, a mustra.
Mester cera porta pa credito mucho halto na banco, cu ta uno di e menasanan mas grandi pa bienestar di ciudadanonan cu hasta por wordo conduci na desesperacion ora nan no por paga!
