Caso Avestruz ta e señal grandi cu democracia ta na peliger
*Esencia di caso Avestruz ta bofon di e ciudadano no corupto!
*Criminalidad ta violacion di base di Ley cu mester proteha
ORANJESTAD(AAN)—Segundo siman di September lo hiba Aruba na e momento grandi di apertura di e aña nobo di Parlamento, cu ta e alma legislador di Aruba.
Kico e palabra “legislador”ta nifica y kico ta e tarea cu e significacion di e palabra ta encera?
Legislacion ta e Leynan di Aruba cu ta dicidi con comunidad mester ta y con cada hende y instancia mester comporta, actua, traha, duna contenido na e comunidad di hende cu ta e esencia di democracia.
Legislacion mester sostene loke ta bon y rechasa loke ta malo. Esaki ta nifica cu tur loke ta trata legislacion, mester haci resalta loke un Pueblo ta considera como “bon”.
Tin reglanan pa participacion na Parlamento cu mester transmiti e valornan moral di un Pueblo den tur sentido.
Con por ta posibel cu Parlamento no ta preveni cu un persona cu a wordo condena dor di Huez, por tin asiento den Parlamento?
Si realmente ta uza Parlamento como e alma di moral di Aruba, for di momento cu un persona wordo acusa di un crimen, e no mester ta den Parlamento mas.
Si pone hasta moral un banda, mester comprende tambe cu Parlamento ta asina importante den e comunidad, cu e ta entrega instrumentonan cu otro ciudadanonan no tin a e Miembro di Parlamento.
Pa un persona cu ta traha como representante di Pueblo, ta posibel pa e pidi informacionnan cu no tur hende por exigi hasta na un director di un departamento of otro entidad cu e pais conoce pa realisa su maneho.
Kico esaki ta nifica?
Esaki ta encera cu un persona cu ta wordo acusa of a wordo condena na algo y ta miembro di Parlamento por pidi informacionnan cu ta mishi cu loke ta parti di acusacion contra su persona.
Presencia di Benny Sevinger den Parlamento sigur ta motibo pa sigui exigi cambio den e leynan cu ta regla participacion na Parlamento.
Mester habri porta pa e nivel di Parlamento, cu ta representacion di Pueblo y como tal mester ilustra kico ta balornan di Pueblo.
Ya diferente instancianan concerni lo ta prepara pa e momento grandi cu Parlamento di Aruba ta reuni y ta scucha di Gobierno kico Gobierno a haci y tin pensa di haci.
Gobernacion di Pueblo na nomber di Pueblo ta alcansa su realidad como representacion di Pueblo segun Democracia.
Pa democracion ta real, e mester representa tambe e moral di Pueblo cu ta motibo di existencia di Parlamento.
