“Parlamento ta na unda democracia di nos pais ta manifesta su mes den su maximo forma”

ORANJESTAD (AAN) – En conexion cu apertura di e Aña Parlamentario nobo (2021-2022), Gobernador Alfonso Boekhoudt, a duna su discurso, den cual a toca puntonan hopi relevante, cuminzando pa nos sistema Democratico y su importancia.

“Awe nos a bini hunto pa celebra apertura di e di 36 periodo di aña Parlamentario di Aruba. Cada miembro di nos Parlamento, recientemente elegi, tin un responsabilidad grandi e aña nos dilanti. Den e sala aki, unda representacion di nos ciudadanonan ta materializa su mes den cada un di boso; e 21 miembronan di Parlamento, ta unda democracia di nos pais ta manifesta su mes den su maximo forma. Akiden lo boso debati, tuma decision y eherce e poder legislativo confia na boso, pa asina cumpli cu e mandato cu pueblo a duna, cargando e responsabilidad pa defende y proteha e principionan di nos Estado di Derecho democratico.

Señor Presidente,

Despues di mas di un aña y mei, e pandemia ta sigui pone un peso enorme riba nos sistema democratico y ta presenta desafionan pa nos estado di derecho. Aunke cu e pandemia a mustra nos cu nos mester a haci algun ahuste fisico pa e practica di democracia, manera limita e cantidad di parlamentarionan presente den sala durante debate y tumamento di decision den cuadro di nos Constitucion, na ningun momento e limitacionnan aki por hustifica un restriccion na eherce e poder democratico.  

Mientras cu e pandemia di COVID-19 su impacto ta keda visible y a pesar di tur e retonan y riesgonan di contagio, nos mester mira cu satisfaccion cu nos por a organiza un eleccion parlamentario di forma democratico. Mescos cu nos tabata testigo con e pandemia a afecta severamente e pilar principal di nos economia, nos mester ta hopi consciente cu no tabata tin un prueba mas grandi pa nos democracia cu e pandemia aki.

            Democracia ta un bien cu mester wordo defendi y protehi constantemente. E no ta solamente un forma di gobernacion caminda pueblo ta scoge su representantenan pa goberna. E ta un balansa entre poder y servidumbre, entre autoridad y consenshi social.

            Democracia ta e.o. ciudadanonan, hopi biaha den forma boluntario, manifestando y tumando iniciativanan pa bienestar general y yudando na mehora e comunidad cu nan ta biba aden. Pa pueblo en general, e ta un balansa entre derecho y deber, entre libertadnan personal y e interes general y cu e interes general no ta e colectivo di e interesnan particular hunto.

            Tur e diferente caranan aki di democracia ta exigi su debido tempo di reflexion. Pero manera nos y henter mundo a experiencia, un pandemia ta duna tiki espacio pa reflexiona. E ta rekeri, tin biaha, decisionnan y accionnan drastico cu por parce cu democracia ta bay den conflicto cu derechonan humano. Mi ta bisa ‘cu por parce’, pasobra hasta pueblonan cu kier proteha nan derecho y libertadnan, ta spera tambe cu nan lidernan proteha nan contra un enemigo inespera y invisible manera un pandemia.

E contradiccion aki ta inherente na democracia: si un poder no experiencia cu un otro poder ta contra-arest’e y ta manten’e den balansa, bo ta haya un poder absoluto cu na su lugar ta destructivo pa e mesun democracia.

                Expertonan internacional ta keto bay analizando e grado di compromiso desea entre interes general y medidanan temporal cu por limita e libertadnan cu nos a custumbra cu ne. Aunke cu ainda no tin un pensamento uniforme riba esaki, locual si por conclui ta, cu caminda democracia ta profundo hancra den curazon di pueblonan, ta tuma mas tempo pa tuma medida cu por restringi libertad. Importante ta awor, pa recupera y siña for di e experencia aki.

            E pandemia a siña nos lesnan cu por sirbi nos pa mehora y fortifica nos democracia. Nos a siña por ehempel cu solidaridad ta esencial pa tin un stabilidad den nos sociedad. Un pueblo solidario no ta bringa unicamente pa su propio interes, pero ta tene debido cuenta cu e libertad y interesnan di su prohimo tambe.

            Pero tambe tin lesnan cu nos no a caba di siña, entre otro, e hecho cu nos mester traha riba confianza mutuo como pueblo. No solamente pueblo mester tin confianza den gobernacion, pero gobernacion tambe mester tin confianza den profesionalnan y miembronan di nos comunidad cu tin interes general na pecho, manera maestronan, esnan cu ta brinda cuido y esnan encarga cu orden publico. Na momento cu nan profesionalismo wordo cuestiona, nos ta atachando nos ordo legal democratico” Gobernador Alfonso Boekhoudt a expresa.