Otmar Oduber di PPA:
- Mester sigura transparencia den procesonan
- Incluyendo esnan cu ta afecta futuro di henter pais
ORANJESTAD (AAN): E reunion di dialuna, contrario na esun di diabierna, tabatin un tono y ambiente completamente diferente. Esaki ta mustra cu ora gobierno, parlamento y tur partido ta traha hunto, Aruba por logra cosnan grandi. Cu esei mes, parlamentario Otmar Oduber a cuminsa su disertacion, reflehando riba e reunion publico di diabierna cu a keda na un forma dictatorial, cu Presidente di Parlamento a core cera e reunion na careda. E enfatisa cu responsabilidad principal di Parlamento ta defende pueblo y para pa loke ta den nan mihor interes y di generacionnan futuro. Parlamento no por ta sumiso ni complaciente cu gobierno, solo pa beneficio propio of partidista.
PPA ta defende transparencia: Parlamentario Otmar Oduber (PPA) a indica claramente cu e reunion publico di ayera tabata un ehempel di desorden y manipulacion politico. “Nos mes a pidi e reunion di 30 januari pa trata procedura di un Rijkswet, no pa discuti un ley cu no tabatin riba mesa. Shete luna despues, e mesun reunion, pa otronan cu no a yama e reunion, ta para e reunion.” Oduber a insisti cu e emocionnan tabata halto, pero pueblo mester sa cu no tabata coalicion mes cu pidi e reunion. “Diabierna nan a bulldoze un ley cu aprobacion di gobierno di Aruba, sin involucra Parlamento, y entrega directo na Hulanda. Aruba keda atras cu un ‘zoek het maar uit’,” segun Oduber. Pa PPA ta cla: Parlamento no por keda un instrumento sumiso, su rol ta defende pueblo y sigura transparencia den proceso cu ta afecta futuro di henter pais.
Un gobierno cu mayoria ficticio: No ta un secreto cu comunidad ta wak Parlamento tur dia. Loke algun ta pensa cu nan ta haci cos leuk, consumi, prohibi otro pa papia, purba crea un sentido di antidemocracion den e sala, chercha y hari otro, cual pa un grupo esaki ta algo cu nan ta gusta y e grupo aki ta sosteni pa cualkier fraccion. Pero tin un gran mayoria di ciudadano, cu no ta haya esaki e comportacion adecuado cu nan kier sigui wak den e sala di parlamento. “Con por ta posibel cu e gobierno y coalicion di parlamento aki por pensa cu ta yena nan cu orguyo di bisa cu nan tin mayoria? Tin un gobierno forma, cu ta carga e sosten di solamente 37% di esunnan cu por a vota den e ultimo eleccion. Pues boso no por ta kiden y bati riba bosos pecho kere cu boso tin mayoria, of cu boso tin 12 asiento, paso boso tin 4 restzetel y p’esey boso por haci loke boso kier?”, tabata expresion di Otmar.
E mensahe di PPA ta cla: Aruba mester un Parlamento fuerte, independiente y sin miedo pa defende pueblo. Un gobierno cu ta sostene su mayoria riba restzetel y manipulacion no ta representa pueblo. Transparencia, respet pa procedura y responsabilidad pa e futuro generacionnan mester bira e regla, no e excepcion. PPA ta pidi un Parlamento cu ta honra su rol democratico, pa Aruba por mira loke ta den su interes y no solamente loke ta den interes di un coalicion of partido.
