ORANJESTAD (AAN): Ex-Ministro di Aruba, esta Dr. Robertico ‘Tico’ Croes a entrega su buki ‘A journey to happiness’
na directora di Biblioteca Nacional Aruba, señora Astrid Britten. E publicacion ta pa e Coleccion Nacional.
Awor como autor, Robertico Croes ta explora y investiga e impacto cu turismo tin riba biaheronan y e comunidadnan cu nan ta bishita y con esaki ta duna forma na felicidad y bienestar di cada individuo. Sr. Croes ta describi e beneficionan di turismo y ta samina e efectonan multidimencional riba areanan manera cultura, medio ambiente y social pero tambe e experencia individual di e biahero.
E autor ta boga pa un acercamento balansa pa turismo y uno cu ta pone e bienestar di hende central den maneho y practica. Sigur un buki interesante pa profesionalnan den sector di turismo pero tambe studiantenan.
Dr. Robertico Croes, ta un profesor na UCF Rosen College of Hospitality Management na Florida. Sr. Croes tabata Minister di Turismo y Asuntonan Economico di 1994 pa 1998 y tambe Minister di Finanzas di 1998 pa 2001 na Aruba. Sr. Croes ta conoci tambe como poeta. Biblioteca tin ‘Potret di un cara desconoci’ (Tico Croes) den su coleccion ilustra pa artista visual Giolina Henriquez, como tambe ‘Alma sangra’ bou pseudoniem ‘Tikoli’.
Por lesa mas tocante e ‘A journey to happiness’ riba e autor su website, roberticocroes.com
