ORANJESTAD (AAN) – Den conferencia di fraccion di MEP di Diaranzon di e siman aki, Parlamentario Shailiny Tromp-Lee a hiba palabra y a referi na dos tema.
Uno ta e presupuesto cu a caba di finaliza, y dos, e Consensus rijkswetnan COHO y RAft 2022, cu a wordo entrega na Januari ultimo un dia 12 y e otro dia 22.
Parlamentario Tromp-Lee a señala cu, inicialmente, e atencion di fraccion di MEP a bay primordialmente riba e presupuesto 2022, pero simultaneamente a haci peticion na cada miembro di e fraccion, pa tuma tempo pa cuminza lesa y analiza e dos consensus rijkswet cu a keda entrega.
E parlamentario a duna di conoce cu asina e presupuesto 2022 a keda aproba, dia 6 di April, fraccion di MEP a cuminza cu reunionnan interno pa trata ambos ley, y nan ta haciendo esaki di manera intensivo.
El a agrega cu tambe a percura pa inculca reunionnan den coalicion, y reunionnan central tambe a cuminza tuma lugar den Parlamento. Esaki ta nifica cu siman pasa nan a cuminza cu un brieven tecnico unda esnan cu a participa den e reunionnan di Aruba cu Hulanda, a bin den sala di parlamento unda e parlamentarionan por a haci preguntanan dirigi pa loke ta trata e dos leynan specifico menciona.
Diaranzon mainta tabata tin e lidernan sindical den Parlamento y Diahuebs awo lo tin e lidernan comercial. Parlamentario Tromp-Lee a subraya cu e reunionnan aki, ta sumamente importante. Awo Parlamento di Aruba mester percura pa manda su preguntanan na Hulanda, pa loke ta trata e dos leynan menciona.
“No solamente nos a incorpora nos propio pregunta, preocupacionnan, y sugerencia pero tambe pa nos inculca den e gremionan sindical y comercial y otronan, cu nos lo atende cu nan”, Tromp-Lee a señala.
El a indica cu ta un tempo hopi preta cu nan tin pa atende cu ambos ley. Aruba tin cu trata dos, mientras cu Curacao y Sint Maarten tin cu trata solamente COHO.
El a agrega cu inicialmente, nan mester a entrega e preguntanan pa dia 20 di April. “Tur tres Isla cu ta Aruba, Curacao y Sint Maarten a manda pidi extension na Hulanda pa te cu dia 17 di Juni, pero lamentablemente nan a otorga nos solamente tres siman y un par di dia adicional cu a pone cu na luga di 20 di April, nos tin cu entrega e verslag dia 13 di Mei proximo, cu ta un bez aki”, e parlamentario a señala. El a señala tambe cu dentro di poco, di dia 3 pa 6 di Mei, e reunionnan interparlamentario (IPKO) ta bay tuma lugar, entre Aruba, Sin Maarten, Curacao y Hulanda. “Sigur COHO ta forma parti di e agenda y mi ta kere cu esey ta un di e momentonan hopi crucial, cu nos como Parlamento lo bay tin pa trata nos preocupacionnan y preguntanan pa loke ta trata e dos leynan di consenso aki, cu ta riba mesa” Parlamentario Shailiny Tromp-Lee a relata.
