Shailiny Tromp-Lee di MEP
ORANJESTAD (AAN): Diabierna ultimo, durante tratamento di presupuesto di enseñansa pa 2022 como prome orador riba e dia aki, mi a pidi atencion special pa e intencion di SKOA pa aumenta schoolgeld y alavez pa e problematica andando rond di werksternan di e Fundacion.
Un problematica cu a origina na 2015 door di un decision politico, caminda un decision a keda tuma door di gobierno cu tabata contrario na loke ley ta describi sin a percura pa e cambio di ley necesario pa carga e decision tuma. Un problematica cu a bira pio ora el a keda coregi na december 2019 door di gobierno sin cu a tene cuenta cu e consecuencia financiero negativo cu esaki ta ocaciona pa SKOA.
Mas cu tur cos ambos decision a conduci awe cu e situacion laboral di e werksternan ta insigur y SKOA a anuncia e intencion pa aumenta schoolgeld drasticamente. Ambos situacion no ta desea y pesey mes mi a dicidi di presenta un mocion al respecto durante tratamento di presupuesto.
Mirando cu SKOA y Gobierno ainda ta na mesa, cu un solucion concreto y structural ta desea, pero ainda Gobierno ta indica cu falta informacion y cifras, kier duna e proceso aki toch un tiki mas tempo. No obstante esaki mi a dicidi pa presente un mocion (mocion nr 20) cu e siguiente peticion.
Segun Shailiny Tromp-Lee, el a urgi gobierno pa yega na un areglo cu SKOA mas pronto cu ta posibel pa evita aumento di schoolgeld y den caso cu ta necesario, pa e acerca Parlamento di Aruba pa Parlamento aproba alocacion for di otro fondonan of kwijtschelding di e sumanan. Alavez mi a urgi gobierno pa bin cu un solucion pa asina evita cu e werksternan ta perde trabao y cu nan derechonan adkeri te cu awor ta keda garantisa.
Mas laat durante e mesun reunion, otro partidonan tambe a presenta mocionnan dirigi riba mesun problematica. AVP a entrega mocionnan nr 25 y 26, y MAS y ACCION21 a entrega mocion nr 27.
Mi ta spera cu pronto un solucion concreto y structural ta keda logra caminda ta atende debidamente cu e problematica y cu por trece paz laboral pa un grupo grandi di trahador
