Parlamento  a ricibi presentacion riba e 'Koopkrachtmodel' pa Aruba

Minister Geoffrey Wever:

ORANJESTAD (AAN):  Riba peticion di Minister Geoffrey Wever, Parlamento di Aruba a ricibi un presentacion for di Economisch Bureau Amsterdam cual a elabora riba e proceso pa traha un modelo di poder di compra (“koopkrachtmodel”) pa Aruba.

             Un “koopkrachtmodel” ta un instrumento necesario cual ta midi e posibel impacto di cambio di maneho di Gobierno riba e poder di compra di hogarnan na Aruba. Pais Aruba pa añanan largo no ta dispone di un modelo importante asina.

            Durante tratamento di begroting 2024 di Ministerio di Asuntonan Economico, Communicacion y Desaroyo Sostenibel den december 2023, Minister Geoffrey Wever a elabora riba e necesidad grandi pa un “koopkrachtmodel”. Basa riba e necesidad y peticion di Minister Geoffrey Wever, Conseho di Ministerraad riba 12 di januari 2024 a duna aprobacion pa inicia e proceso pa traha un “koopkrachtmodel” pa Aruba. Minister Geoffrey Wever a aloca e fondonan necesario di su begroting pa por traha e “koopkrachtmodel”.

            Pa haci proyeccion di desaroyo di nos economia Departamento di Asuntonan Economico, Comercio y Industria ta haci uzo di e modelo macro-economico MARUBA. Pero e modelo MARUBA ta limita solamente na maneho actual, y no ta posibel pa midi e impacto di cambio di maneho di Gobierno riba e poder di compra di hogarnan na Aruba.

            Un meta importante di maneho economico ta pa mehora e poder di compra di tur ciudadano. Pa logra e mehoracion di poder di compra ta necesario pa tin un instrumento manera e "koopkrachtmodel” cu por midi e efecto di cambio di maneho di Gobierno, y a base di esaki por entre otro ilustra unda mester bin adaptacion prome cu implementacion di esaki. Como instrumento, e “koopkrachtmodel” lo contribui pa implementa maneho cu ta beneficia e poder di compra di hogarnan na Aruba.

            Traha un "koopkrachtmodel" ta rekiri haci e inversion necesario pa asina Pais Aruba por dispone di un instrumento importante pa traha y implementa maneho cu e fin di mehora poder di compra na Aruba. P'esey ta na su lugar pa Parlamento di Aruba ta debidamente informa riba e importancia di inverti den traha un koopkrachtmodel y riba e proceso pa yega na esaki, segun minister Geoffrey Wever.