*Ta prohibi humamento den areanan publico -- ORANJESTAD (AAN): Diamars mainta Minister di Salud Publico Sr. Dangui Oduber tabata den Parlamento di Aruba pa trata e ley di “Landsverordening tot wijziging van de Landsverordening beperking tabaksproducten”.
E ley aki ta un stap hopi importante den cuadro di e plan nacional prevencion cu ta wordo maneha pa e NCD’s stuurgroep.
Humamento ta causa daño na bo curpa manera cancer y malesanan cronico, entre otro presion halto, stroke, infarto y dolor na bo pecho. Nicotina ta reduci e “caliber” di bo adernan locual ta causa cu bo presion ta subi.
Pa e motibo aki a cambia e ley pa:
- Aumenta e edad di cumpra sigaria di 18 aña pa 21 aña. Esaki ta debi na un estudio cu a wordo haci pa World Health Organization (WHO) unda ta mustra cu aumentando esaki ta baha e probabilidad cu un hoben ta cuminsa na huma sigaria.
- Ta prohibi tambe e benta di sigaria los. Den cuadro di esaki Gobierno lo bay sinta hunto cu e Asociacion di Chines pa splica nan e plan di prevencion cu Gobierno tin.
- Prohibi humamento den areanan publico, incluyendo na scolnan.
- Prohibi persona adulto y/of mayornan cu ta huma den auto den compania di menornan di edad.
Cuerpo Policial ta esnan cu tin e tarea pa controla na cumplimento di e ley aki, lo bay tin sancion den caso di incumplimento.
Cu esaki Ministerio di Salud Publico kier pa mayornan y docentenan enfatisa mas ariba e efecto di uzo di tabaco entre e hobennan. E ley aki ta specialmente pa proteha nos muchanan y hobennan pa evita cu nan ta wordo converti den un humado pasivo (secondhand smoker), cu consecuencia pa:
- Aumenta infeccion na horea
- Aumenta crisis asmatico
- Aumenta riesgo pa bronchitis y pneumonia
- Sintomanan respiratorio
Minister Oduber a menciona cu lo bay tin diferente campaña di conscientisacion tocante e ley aki y tambe henter e plan nacional di prevencion di malesanan NCD’s. "A keda proba cu cada florin cu bo inverti den prevencion bo ta haya 5 florin bek on the long run" tabata expression di Minister Dangui Oduber.
Minister Dangui Oduber a gradici henter Parlamento di Aruba pa abroba e ley di beperking tabaksproducten unanimamente. E ley aki ta bay aporta grandemente den tur e trabounan cu ta bay tin riba prevencion den salud. Minister Oduber kier a gradici tur e miembronan di parlamento pa nan contribucion constructivo y positivo.
