ORANJESTAD (AAN)—Minister di Salubridad y Turismo señor Dangui Oduber, a referi na e “Landsverordening Beperking Tabaksproducten” (LBT)
cu mester a worde trata den Parlamento Diamars, di e siman aki y tambe a elabora tocante e Plan di Prevencion di Salud
E mandatario a splica cu esaki ta un ley existente, pero cu for di 2017 caba, gobierno a mira cu mester a bin algun cambio of ahuste. Oduber a indica cu esaki ta e ley cu ta regarda prohibicion di humamento den areanan publico.
“E ley aki den pensamento di e Departamento di Salud Publico, tempo el a worde aproba y trata den Parlamento e tabata un ley completo. Nos mester a haci algun cambio y esaki a worde haci tambe. E tabata un trayecto cu e ley mester a encamina, pero el a yega Parlamento di Aruba”, e dignatario a señala.
El a menciona cu e cambio mas importante den e ley aki ta e prohibicion di humamento den areanan publico, e aumento di edad pa cumpra cigaria cu a cambia di 18 aña pa 21, ta bay prohibi tambe bendemento di cigarianan los, manera ta e caso aworaki, y lo bay ofrece proteccion tambe na menornan di edad; si por ehemplo, un mayor ta worde gara ta huma cigaria den compania di un menor di edad ta bay tin un multa pa esaki.
Gobierno ta considera e ley aki uno hopi importante, den cuadro di e Plan Nacional di Prevencion, cu a worde lanza na Maart aña pasa pa Gobierno, cu e intencion di worde implementa y ehecuta, pero lamentablemente a bin e pandemia y no por a ehecuta e plan aki, manera tabata desea, pero awo e intencion ta pa conhuntamente cu e stuur groep y tur stakeholders enfoca riba prevencion di salud, via campañanan di concientizacion.
“Nos kier bin cu un clinica di obesitas na Hospital y nos ta bay cuminza cu e proyecto piloto aki cu dentro di poco nos ta bay anuncia, pasobra nos tin cu bay inverti na prevencion pa nos tin un comunidad mas saludable, baha e mortalidad y naturalmente percura pa nos tin un fondo di AZV cu ta sostenible; pasobra simplemente, cu tur e proyeccionnan cu tin aworaki, dificilmente por mantene AZV sostenible, mirando cu nos tin vergrijzing y un comunidad cu, lamentablemente, no ta esun di mas saludable.
Kier mira un comunidad cu ta move mas, come mas saludable y cu por garantiza cu e pakete cu ta brinda na aseguradonan, por keda brinde pa medio di e Plan Nacional di Prevencion, cu ta bay anuncia y e Landsverordening Beperking Tabaksproducten ta parti importante di e campaña cu ta bay cuminza cune.
