Rocco Tjon:- ORANJESTAD (AAN): Dialuna durante un reunion di comision central Parlamento a aproba e peticion di Minister di Husticia Andin Bikker,
pa mientrastanto en espera di tratamento di presupuesto di pais Aruba di 2021 por adkiri cierto material pa Cuerpo Policial.
Durante un conferencia di prensa Diamars mainta, parlamentario Rocco Tjon di fraccion di MEP a indica cu ta trata aki entre otro di materialnan pa garantiza e seguridad di agentenan policial y tambe di e ciudadanonan.
Tjon a splica cu partido Raiz tambe a bay di acuerdo cu esaki.
Esaki tabata a base tambe di un peticion pa cumpra mas "bulletproof- vests" pa e polisnan y algun aparato pa yuda frena e casonan di tiroteo.
Banda di esaki Tjon a splica cu a duna aprobacion pa por cuminsa cu un klas nobo pa KIA y KPA.
Esaki tambe ta importante pa por sigui brinda seguridad.
“A duna aprobacion tambe pa cuminza cu un investigacion di exploracion pa yega na un cantidad di vehiculo nobo pa Brandweer”.
Mi ta kere cu esaki ta hopi importante.
Den pasado e comision di husticia den Parlamento a reuni hopi biaha cu Brandweer y su sindicato SIMBA riba nan preocupacionnan y locual semper tabata wordo treci pa dilanti ta cu e ‘wagenpark’ mester wordo cambia, esta cu mester bin vehiculonan nobo, segun Tjon.
E Parlamentario a sigui bisa cu esaki ta importante pa seguridad di un y tur riba nos isla, pa e palabracionnan cu a wordo haci cu aeropuerto y tambe pa garantiza seguridad di nos turistanan na hotel y otro camindanan.
Tjon a sigui bisa cu e vehiculonan ta hopi bieu y e comision cu minister Bikker a institui cu ta consisti di miembronan di Brandweer y di e sindicato, recientemente a bay Merca y a haci un estudio pa loke ta 3 vehiculo cu nan tin mester di dje.
Atravez di e aprobacion cu a wordo duna na minister di Husticia Dialuna, e ta bay studia e posibilidadnan prome cu 16 di Augustus, pasobra e oferta cu tin ta conta te cu e dia ey.
E parlamentario a indica cu si logra cumpra e vehiculonan, esakinan lo contribui hopi bon na seguridad di un y tur pa entre 5 cu 10 aña.
