Parlamentario Wever-Croes a reuni cu Raad van State y Tweede Kamer na Hulanda

ORANJESTAD (AAN): Durante su bishita na Hulanda Parlamentario Evelyn Wever-Croes a reuni cu Raad van State y

cu lidernan politico den Tweede Kamer cu ta Parlamento di Hulanda. Parlamentario Wever-Croes tabata tin e oportunidad di papia cu señor Rob Jetten cu tabata minister na Hulanda mesun temporada cu Gabinete Wever-Croes tabata den gobernacion. Durante e temporada aki a yega na varios palabracion importante riba e tereno di energia y fondonan pa Aruba. 

Parlamentario Wever-Croes a indica cu actualmente Hulanda ta preparando pa bay urna electoral dia 29 di Oktober 2025 y lo ta hopi interesante pa mira e gobierno cu lo wordo forma. Tambe el a remarca cu ta hopi importante si pa pronto e gobierno nobo apunta un Minister Plenipotenciario pa Aruba na Hulanda mirando cu ainda despues di 3 luna cu e gobierno nobo a forma, Aruba no tin un representacion, y esaki ta strobando pais Aruba pa logra e metanan cu mester logra na Hulanda. 

Tambe Parlamentario Wever-Croes a reuni cu Raad van State, cu su persona ta considera e aliado mas importante pa Aruba. Durante su reunion el a papi acu e vice-presidente señor Tom de Graaf y tambe cu miembro di Aruba señor Andy Lee, y señor Richard van Zwol cu semper tabata un bon consehero pa Aruba. 

“E ta importante pami como miembro di Parlamento y como lider di partido MEP pa mantene e contactonan aki, pasobra semper Aruba lo tin un relacion estrecho cu Hulanda. E tabata hopi bunita pa mira con portanan ta sigui habri y cu tin hopi disponibilidad pa sigui traha pa yuda Aruba na Den Haag. Loke nos mester ta mustra seriedad. Aruba mester di un gobierno completo y cu ta mustra liderazgo y responsabilidad” Parlamentario Wever-Croes a expresa.