ORANJESTAD (AAN): Durante di tratamento di presupuesto di DOW pa aña 2021 cu a keda trata dia 21 di october 2021,
Parlamentario Tromp-Lee a pidi Gobierno pa e lista di scolnan cu lo keda renoba of manteni den 2021-2022. Esaki a keda poni ter inzage durante reunion.
Despues di a revisa e lista, Parlamentario Tromp-Lee ta remarca cu e contento di por a tuma nota di diferente proyectonan cu porfin ta bay mira luz di dia den aña 2022. Scolnan cu pa hopi aña ta den espera di e atencion debido y of renobacion/construccion necesario.
Un scol cu sigur durante tur tratamento di presupuesto Parlamentario Tromp-Lee ta papia di dje ta Sint Aloysius School na Noord. Tromp-Lee ta indica cu e ta hopi contento di wak e renobacion di e scol aki riba e lista di Proyecto di DOW pa 2021-2022 un biaha mas, mirando cu den pasado e tabata riba e lista caba pero e renobacion no a tuma lugar.
Pesey mes Tromp-Lee a haci un peticion special na Minister President y Director di DOW pa no lag’e aparece solamente riba e lista pero pa enberdad cristalisa e proyecto aki. Esaki ta necesario mirando cu nos muchanan di Noord, tur mainta mester subi den un bus pa bay nan scol na Playa y bin bek atardi pa Noord. Nan merece di por bay nan scol bek cu ta situa den cura di misa na Noord, den nan districto y den un localidad apto y adecuado. Pesey mes Tromp-Lee ta indica cu e lo keda monitoria e proceso aki y ta keda pidi Gobierno pa trat’e como un prioridad. Algun dia despues di e reunion publico, Tromp-Lee a tuma nota di un anuncio di Gobierno caminda ta anuncia nan intencion pa renoba e scol y caminda companianan cu ta interesa pa haya e trabou aki por inscribi.
Dia 19 di november 2021 e destaho publico lo tuma lugar. Mirando cu e anuncio ta trata solamente renobacion di e parti Noord di e scol, Tromp-Lee ta bay haci un apelacion urgente na Gobierno pa percura pa e parti zuid tambe keda renoba. Esaki ta sumamente necesario, mirando cu ya caba durante e ultimo renobacion cu a tuma lugar añanan atras, ya caba e parti aki no a haya e atencion necesario. Alabes e realidad ta cu e banda aki mester di su renobacion.
Segun Tromp-Lee ta e momento tambe pa percura pa un caminda adecuado pa e muchanan por haya les di gym. Pa es motibonan aki Tromp-Lee ta haya un renobacion total ta na su lugar.
Otro scol cu Tromp-Lee ta hopi contento pa mira riba e lista di proyecto di DOW pa aña 2021-2022 ta e renobacion di e edificio bieu di Prinses Amalia Basis School pa por aloca Frere Bonifacius. Un scol cu 9 a 10 aña pasa tambe a wordo saca for di nan localidad. Un localidad cu por cierto no ta ni existi mas pasobra esaki a keda basha abou. Frere Bonifacius ta un scol cu tambe merece di haya un localidad permanente bek pa nan por duna les na nan muchanan den un edificio adecuado.
Actualmente ambos scol ta situa na VAD-gebouw na Playa (pariba di Yrausquin & Sons). Un edificio no ideal y of adecuado pa ta un scol. Tromp-Lee ta termina bisando cu door di pone e scolnan aki bek den un edificio renoba di SKOA, esaki lo reduci e gastonan mensual pa huur drasticamente.
