Na 1939 e di Dos Guera Mundial ta cuminsa na Europa. Na e manera cu e guera ta avansa den Europa por a ripara cu Aruba tambe ta cuminsa sinti efectonan di guera.
Ta bon pa trece dilanti cu Aruba tambe a conoce casonan na unda cu civil y militar a perde nan bida inocentemente of accidentalmente.
Nos Historia Nos Herencia ta trece e siguiente casonan:
Pedro Dijkhoff:naci December 5 1902 tabata marinero ariba e barco Gaviota ( Nicaragua). E barco a sali di Aruba cu destino Santo Domingo. Nunca a yega su destinacion.
Tin indicacion cu submarino U 158 of U 502 a sink e barco ariba lama alrededor di June 2 1942. No a haya e curpa.
Segundo Jorge Adelberto (Boy)Ecuri: naci 23/4/1922
Studiante y miembro di e grupo di resistencia anti Aleman.
Militia Aleman a ehecuta Boy dia 6 di November 1944 na Waalsdorpvlakte na Den Haag
A localisa y identifica e curpa y translada pa e barco HNLMS van Speyk na 1947 y ta dera na Santana Catolico na Oranjestad.
Pieter Joosse: Luitenant 2e klasse di Koninklijke Marine Arnhem Hulanda, naci di 31 di December 1912
Pieter ta perde su bida dia 17 di februari 1942 ora ta purba desmantela un torpedo aleman tira pa e submarino U-156 ariba beach cerca di refineria Eagle
Na 1999 a transferi e cadaver for di Aruba pa e Nederlandse Oorlog Begraafplaats na Loenen Apeldoorn.
Leonardus Kooijman
Marinero 1e klasse di Koninklijke Marine ta naci na Hulanda di 3 di maart 1916.
Leonardo ta perde su bida dia 17 di februari ora cu ta purba na desmantela un torpedo aleman ariba e beach cerca di refineria Eagle.
E torpedo a wordo tira pa e submarino aleman U 156.
Na 1999 ta transporta e cadaver for di Aruba pa e Nederlandse Oorlog Begraafplaats na Loenen Apeldoorn.
Elias Lacle
Soldad miembro di Schutterij, naci dia 30 di Augustus 1919. Elias ta fayece den un incidente di tiro dia 28 augustus 1944 na e bunker di municion na Balashi.
Dirk A C de Maagd
Sargento Mayor, Specialista den desactivacion di torpedo, miembro di Koninklijke Marine na Tholen Hulanda. E ta naci 5 di September 1894.
Dirk ta fayece dia 17 di februari 1942 den un intento pa desmantela un torpedo tira pa e submarino aleman.
E torpedo tabata tira ariba e beach cerca di refineria Eagle. Na 1999 a tranporta e cadaver di Aruba pa Hulanda.
Abelario C Makaai
Soldad miembro di Schutterij. Naci dia 31 di Maart 1921 na Bonaire y ta fayece dia 4 di Januari 1942 debi na un incidente di tiro.
Na 2008 a transporta e cadaver pa Curacao.
Bartolo Tromp
Koki, naci dia 4 di December 1898.
Bartolo tabata ariba e barco Gaviota cu a perde ariba e ruta Aruba pa St. Domingo.
Tin indicacion cu e submarino U 158 of U 502 a sink Gaviota alrededor di June 2 1942
Nunca a haya e curpa.
Arturo Verhoek
Capitan di Gaviota. Naci di 27 di Maart 1900. Gaviota a perde ariba e ruta entre Aruba y St Domingo. Ta calcula dia 2 di Juni 1942. Tin indicacion cu e submarinonan U 158 of U 502 a sink Gaviota.
Nunca a haya e curpa
Hendrikus Wensing
Pasahero ariba e crucero Simon Bolivar di KNSM naci 23 di Oktober 1936 y a muri den Noordzee dia 18 di November 1939.
E crucero Simon Bolivar ta dal dos mina explosivo y ta sink banda di Harwich Reino Uni.
Crismo Willems
Soldad di Schutterij naci dia 25 di oktober 1919 y ta muri dia 23 di Februari 1944 den un incidente na unda cu un otro schutter a tira ariba Crismo y ta raka Crismo den bariga. Crismo ta fayece 8 dia despues di e accidente y ta dera na Santana di Santa Cruz.
Compila pa Roberto Croes
