Den cuadro di nan preparacion pa celebra su di 103 aniversario:
ORANJESTAD (AAN) – Parlamentario di fraccion di MEP, Shailiny Tromp-Lee, den conferencia di prensa Dialuna, a elabora tocante e di 103 aniversario di KLM y e casita tradicional cu e compania a scoge pa ubica na Cas Ecury, awe sede di Museo Arkeologico Arubano.
E parlamentario a comenta cu diabierna ultimo, dia 7 di October, el a wordo invita pa forma parti di e celebracion aki.
Manera ta conoci den cuadro di esaki KLM a lanza su tradicional casita, cu cada aña e compania ta presenta. E biaha aki ta e cas miniatura 103, unda nan a scoge e Cas Ecury pa ubica e casita aki, cu ta sede di Museo Arkeologico aworaki.
Parlamentario Tromp-Lee a bisa cu Museo Arkeologico ta un di e herencianan di mas bunita cu pueblo di Aruba tin, como pais, pasobra e ta demostra comunidad, e trayectoria berdadero cu nos hendenan a encamina, pa nos ta para na unda nos ta awe, den aña 2022.
El a expresa cu e museo aki ta desplega un historia rico, y e ta kere cu mediante e cas cu KLM a brinda na esnan cu ta brinda cune, den Business Class, atravez di e film cu a keda traha pa presenta e cas aki, y cu ta bay draai den vuelonan na diferente destinacion, ta un valor agrega hopi importante pa Aruba, y pa e por mercadea su mes y esaki ta algo cu KLM ta haciendo posible.
Pa finaliza, Shailiny Tromp-Lee a felicita Triple A, ATA, Fondo di Monumento, Gobierno y tur esnan cu a haci esaki posible y a gradici KLM pa e escogencia cu nan a haci. Esaki ta demostra cu Aruba y KLM tin un relacion hopi estrecho y cu e compania ta un partner hopi importante di Aruba su industria turistico; y mas cu tur cos, e ta e link cu un pais cu ta brinda nos hobennan pa sigui desaroya y pa mayornan por bay bin, pa ta cerca di e muchanan.
El a reitera cu e ta felicita KLM pa nan 103 aña y gradici nan pa nan aporte te cu awo, y ta spera di sigui conta riba esaki y cu un dia Aruba por ta un stop pa nan tambe.
