ORANJESTAD (AAN): Diaranson ultimo, 6 di december 2023, mi tabatin e honor di por a participa na un bunita celebracion di fin di aña hunto cu studiantenan na Den Haag.
Danki na mentor Shahaira Brokke mi por a comparti cu e studiantenan y papia cu algun di nan di nan estudio, nan experiencia na Hulanda te awor, e retonan mas grandi cu nan tin y nan bida en general na Hulanda.
Un bunita anochi organisa y ehecuta pa e mentor y opvangcommissie di Den Haag. Un anochi caminda miembro y colaborado di e opvangcommissie mes a cushina y prepara un tremendo ‘driegangen menu’ cu nos toke Arubiano. Hunto cu e mentor nan a transforma un lokaal na Haagse Hogeschool den un lugar festivo y cu un dushi ambiente.
For di combersacion cu e mentor, miembronan di opvangcommissie y algun studiante, mi por conclui cu nan ta hopi activo. Ta di admira con activo e mentor y e opvangcommissie ta. Banda di duna sosten pa cu e startsituatie di e studiantenan ora nan yega, durante aña ta organisa reunion y actividadnan informativo, di formacion pero tambe social recreativo. Esaki e Mentor ta haci banda di su tareanan structural. Ta di aplaudi con involucra e mentor di Den Haag ta cu su studiantenan y con organisa e opvangcommissie ta.
Durante e anochi tambe mi a cera conoci y a combersa cu sra. Marianne van Veldhuisen,
Adviseur Instroom di De Haagse Hogeschool. Un señora hopi involucra cu nos studiantenan y cla pa yuda esnan cu ta studia na nan scol. Alabes e ta sostene nos mentor hopi bon ora esaki ta necesario. E conoce y a bishita nos islanan y asina tambe a crea un grado di comprendemento grandi pa e situacion di nos hobennan cu ta bin di Aruba.
Pa finalisa e anochi mi a desea tur presente feliz dianan di fiesta. Na e hobennan alabes mi a desea hopi forsa pasobra nan lo pasa e dianan di fiesta leu di cas y mas cu claro a desea nan tur clase di exito cu nan estudio. Mi a subraya e hecho cu nunca nan mester give up y kere semper den nan mes. Pa cualkier problema tin un solucion, pa cualkier duda, un contesta. Ta un cuestion di durf puntra pa yudansa y no tarda pa haci esaki.
