*Y si Ivo Valdez tin permiso di e miembresia pa envolve su mes den asunto politico
ORANJESTAD (AAN) – Parlamentario Ricky Hoek, den conferencia di prensa di Fraccion di MEP, Diaranzon cu a pasa, a referi na e preocupacion cu Organizacion di Pensionadonan Publico di Aruba (OPPA), tin pa loke ta integridad y transparencia den gobernacion.
Hoek a reaccion riba e Presidente di OPPA, señor Ivo Valdez, y e ta puntra si OPPA ta un partido politico, pasobra Ivo Valdez, desde 2010 y te aworaki ta presta su mes pa metanan politico di un partido specifico; e partido cu kier sigui manipula y gaña pueblo.
E ta bisa cu e partido en cuestion di a hiba Aruba den un situacion un poco peculiar, na unda Movimiento Electoral di Pueblo, a sa di drecha y ta continua di drecha y sanea e situacion financiero cu nos pais ta aden.
Hoek ta subraya cu e pregunta ta si realmente OPPA su miembresia, cu ta pensionadonan, ta duna permiso y autoridad na señor Ivo Valdez, pa e envolve su mes na asuntonan politico, pasobra nos a wak un caminda unda OPPA ta expresa preocupacion pa integridad y transparencia den gobernacion, y ta manda carta pa Gobernador, pa loke ta trata carteranan di ministernan; cu tur su libertad di expresion e por manda carta riba su preocupacionnan, pero esaki no ta e caso ni e metanan riba locual OPPA, como Organizacion, mester enfoca su mes.
“E ta kere cu awendia, nos pensionadonan cu ta un grupo grandi, y tur cu ta miembro di OPPA, y esnan cu no ta miembro di OPPA, mester cuestiona e pregunta, si enberdad señor Valdez tin autoridad, den nan nomber, di bay haci politica cu e Organizacion, pasobra e mester enfoca su mes, netamente, den regarda e pensionadonan.
“Lamentable ta pa bisa cu señor Valdez, na ningun momento, ta cuestiona e 50% di aumento cu señor Eman ta gaba di aumenta pensioen, pasobra esey nos sa cu no ta un realidad husto pa e fondo di pensioen cu tin actualmente. Nos a wak caba cu dia 2 di October 2023, a sali den e mesun matutino unda cu e presidente (OPPA) a invita e meneer aki, pa bin haci campaña politico caba den e reunionnan di actividadnan di OPPA, y mi ta kere cu kizas, esey mester wordo cuestiona door di mesun pensionadonan, si esaki ta e factornan cu mester bin dilanti y trata tambe pa e Organizacion OPPA”, Parlamentario Hoek a bisa.
El a agrega cu na ningun momento a wak señor Valdez cuestiona cu e aumento di 50% di pensioen, lo tin consecuencianan hopi grave tanto pa e pensionadonan, como pa esnan cu ta na porta di haya pensioen y esnan cu lo tin cu haya pensioen den futuro. “Pasobra cu nos sa cu door di investigacion a determina cu den tres aña e fondo aki lo kibra, si lo hisa e pensioen cu 50%. Pues, esaki ta un promesa cu ta sona hopi bunita, pero e ta hopi peligroso pasobra na momento cu bo bisa cu lo subi e pensioen cu 50%, e pensionado lo goza di esaki pero despues di tres aña bo sa cu ningun hende mas lo haya pensioen. Ni esnan cu ta hayando awo ni esnan cu ta wardando nan pensioen ni esnan cu mester bin na remarca pa haya pensioen”, Parlamentario Ricky Hoek a señala.
