ORANJESTAD (AAN) – Miembronan di Parlamento, a haci un bishita reciente na Crisis Management Office (CMO), antes Bureau Rampenbestrijding Aruba (BRA).
E meta di e bishita aki tabata pa wordo informa e motibo pakico a cambia di BRA pa CMO, y Parlamentario Ricky Hoek, di Fraccion di MEP, den entrevista cu DIARIO, a señala cu nan a haya un splicacion extenso.
El a menciona cu CMO ta encera tur tipo di crisis y calamidad cu por sosode na Aruba. E departamento aki ta bay atende cu diferente tipo di crisis. Nan a wordo splica cu un crisis tin un comienzo y un final, pues e ta un temporada.
CMO a splica e parlamentarionan kico ta tur e tipo di crisis cu nan ta bay atende cu ne, podise un bom, calamidad for di awacero, temblor, explosion, etc.
“Pa nos como Parlamento tambe ta importante cu a wak tur e ekiponan cu nan tin, con a yega na nan, y mi mester bisa cu ta un departamento cu ta mustra bastante sostenibel, pasobra nan a tuma over e truck di salud y nan a converti’ e den nan truck di trabao, pues esaki, pa nos como parlamentario ta hopi importante tambe. Nan a duna nos splicacion di e leynan cu lo mester cambia. Nan tin leynan pendiente na Departamento Huridico y nan ta bezig cu’ne caba. Nos a puntra con leu esaki ta, ki status e tin, y con Parlamento lo por sigui traha riba esaki, pa cambia nan Landsverordeningnan como departamento, como Crisis Management Office Aruba” Hoek a menciona.
El a agrega cu e parti di finanzas tambe, nan presupuesto, mirando cu aki poco tempo Parlamento lo bay traha riba e presupuesto di Aruba tambe. Kizas mester mas ambulance, mas ekipo, y esaki tambe por duna mas idea di unda mester pone mas enfasis riba e presupuesto tambe, pa asina aki kizas aloca fondonan pa e ekiponan cu nan mester. Esey ta importante, Hoek a subraya, pasobra CMOA ta traha pa henter Aruba; e ta un departamento cu cualkier momento mester ta accesible, mester por t’ey pa duna asistencia, y e ta un di e mihornan cu tin den Caribe aworaki.
