ORANJESTAD (AAN): St. Aloysius School ta un di e scolnan mas bieu den pueblo di Noord. Na momento cu e scol a keda funda, e tabata e ‘jongensschool’ pa e disctricto di Noord.
Awe, pa mas di 80 aña caba e scol aki ta formando muchanan di Noord. Diamars mainta Prome Minister di Aruba señora Evelyn Wever-Croes y Parlamentarionan di Fraccion di MEP a haya un recorido door di Minister di Enseñansa y Deporte sr. Endy Croes na St. Aloysius School.
E recorido tabata tin como meta pa mustra tanto Prome Minister señora Evelyn Wever Croes y e Parlamentarionan di fraccion di MEP con leu e trabaonan di renobacion ta na St. Aloysius School. E trabaonan di renobacion ta drentando su fase final y pa e aña escolar nobo 2023-2024 lo ta habri pa su alumnonan, maestronan y pueblo di Noord en general.
Enseñansa ta un di e pilarnan mas importante pa un pais. Un pais cu un bon sistema di enseñasa, lo contribui cu e ciudadanonan di e pais tambe lo tin un nivel halto di educacion. Esaki na su turno lo haci cu e pueblo lo compronde y traha mas miho na e desaroyo di su pais.
Aruba ta conta cu un bon sistema di enseñansa si nos compara esaki cu Caribe, Latino America y otro paisnan na mundo. Sinembargo, nos sa cu tin espacio pa mehora esaki y Gabinete Wever-Croes ta comprometi pa traha na e mehoracion aki.
Maneho di Minister di Enseñansa y Deporte: Minister di Eseñansa y Deporte Sr. Endy Croes ta hibando un bon maneho pa loke ta trata enseñansa na Aruba. Den e caso di St. Aloysius School Minister Endy Croes a hiba un bon maneho di renoba un scol hopi importante den disctricto di Noord.
Di e forma aki Minister Endy Croes ta garantisa cu enseñansa tin su lugar prominente den dicho distrito. Tambe por wak cu e historia y arkitectura di e scol aki a keda conserva.
Minister Endy Croes su maneho ta stimula nos muchanan, nos maestronan y mayornan pa sigui atende y kere den Scol St. Aloysius pa e siguiente decadanan nos dilanti.
