WILLEMSTAD: Kico pa haci cu e refineria cu tin na Curaçao? Recientemente e gremio di Sentral Sindikal di Korsou (SSK) a propone pa organiza un “Cumbre” pa asina papia y brainstorm pa cu e futuro di Refineria y Bullenbaai na e isla.
Nan ta sugeri esaki, pasobra e desaroyonan pa cu e Refineria y e zona ey no ta canando manera mester ta. Esaki ta strobando e desaroyo economico y social di e isla, incluyendo trahadornan den e sector aki. Hopi politico y esnan den gremio ta lamenta cu Prome Ministro Pisas no ta tumando un actitud proactivo pa trata na resolve esaki.
Pesey SSK ta kere pa organiza un Cumbre hunto cu tur stakeholder den e sector. Nan ta haya cu na e momento critico aki, tin di bay tuma decision den ki direccion mester bay hunto, y pone tur gremio di interes hunto, pa yega na un decision pa orienta futuro di e Refineria.
Esey ta loke Parlamentario Giselle McWilliam di Partido MAN tambe ta opina. Segun e Parlamentario, e ta sostene e Cumbre aki. Sigur cu e representantenan di sector y di clase trahador y di comercio sa di e importancia pa logra bienestar social y socio-economico di e isla. Pesey nan ta sostene SSK den e peticion aki, y nan tambe ta pidi Prome Ministro Pisas pa asumi responsabilidad di su funcion y deber pa sinta na mesa cu tur stakeholder y crea un vision real y coherente den e sector aki cu mester trece perspectiva y desaroyo pa Curaçao y e clase trahador y su famia.
