Señora Frances Figaroa:
ORANJESTAD (AAN) –Señora Frances Figaroa a informa tocante e decision di a lanta un Comision, pa trata e asunto di pensionadonan cu ta ricibi un pensioen di SVb Curacao, y cu ta sinti cu nan ta trapa riba e derechonan cu nan tin. E Comision ta invita tur e pensionadonan concerni biba na Aruba pa un reunion diasabra awo, 26 di Augustus na Club Caiquetio, y e intencion ta pa hiba e caso den Corte.
Esaki ta tambe, e pensionadonan cu a haya un carta durante aña 2017, pues seis aña pasa, cu ta bay rebaha nan pensioen cu 10%. Tambe na December 2016, a kita e kerstbonus cu nan tabata ricibi tur aña.
“Pues, esaki ta informacion cu nos ta dirigi na e pensionadonan aki so. No esnan cu no ta conoci na SVb Curacao durante e periodo ey. Pakico mi ta bisa esey? Pasobra tur cu a bira victima di e reduccion di 10% y a kita e kerstbonus, ta esnan cu tin un number registra na SVb Curacao. Nos ta yame ‘AO number’.
E number ey ta hopi importante pa nos. Esaki ta e personanan cu nos kier dirigi como comision na nan, pasobra nos a dicidi cu awor si tin cu tuma accion. Nos ta sinti nos mes, na nomber di e pensionadonan, cu no ta duna atencion na e derechonan cu nos tin. Nos ta papiando di 1 di Januari 1986, cu Aruba a haya su Status Aparte, a sali for di Antiyas, anto hopi di e pensionadonan ta biba na Aruba, nos a compronde cu ta mas cu mil, por ta, ta hopi mas, aki na Aruba cu ta cay bao e sistema aki, y tambe nos tin Arubianonan cu ta biba den exterior. Nos tin nan tur parti di mundo. Canada, Alemania, Spaña, Hulanda y otro paisnan tambe”, Frances Figaroa a declara.
Den pasado tabata tin un grupo yama “Grupo Accion pa Derechonan di Pensionado” cu lamentablemente no a continua cune, pero nan a dicidi awo, for di un otro constelacion di un Comision, pa awor si bay dilanti cu e topico aki, di e reduccion di pensioen di e pensionadonan cu ta ricibi esaki di Curacao.
“Nos kier trece informacion padilanti y nos kier haya sa ken ta e personanan cu a bira victima di e sistema aki. Pesey nos kier haci, cordialmente, un invitacion pa un mainta informativo pa e pensionadonan, manera mi a menciona, y esaki lo tuma lugar na Club Caiquetio na Paradera, Diasabra dia 26 di Augustus. Nos tin cu registra tur di nobo, pa 9’or y pa 9.30 exacto nos ta cuminza cu e reunion. Nos ta spera di termina pa 11 or of 11.15”, Frances Figaroa a indica.
El a pidi pa por fabor, na cada pensionado, bin cu su number di AO cu tin riba e carta cu e ta ricibi di su pensioen di SVb Curacao, y si ta posible tambe si tin un number di what’s app, celular, telefon di cas, of email.
