ORANJESTAD (AAN):Segun Parlamentario Alvin Molina di MEP, semper tin espacio pa mehoramento.
Lamentablemente tin departamento di gobierno cu e espacio ey ta hopi grandi, procesonan basico di duna servicio falta hopi pa worde drecha. Den e caso di Oficina di Censo y Registro Civil (Censo), tin cu admiti, si nos kier busca oportunidad pa mehoracion, nos tin cu busca pa detaye chikito.
Si nos compara CENSO di antes cu e servicio cu ta worde duna awendia na pueblo di Aruba, ta mira cu e procesonan general ta canando hopi bon. Esaki ta danki na e vision, strategia y plan di director di Censo y su ekipo di maneho como tambe di esfuersonan di ambtenaar cu ta gosando di un liderazgo y maneho fuerte.
Pa nos grandinan un bishita na CENSO ta un rato sali di cas pa distrai y topa cu otro. No tur hende ta mes educa riba uzo di websites pa yega na documentonan oficial, algo sigur pa tene cuenta cune ora ta planea pa “digitalisering”. Implementacion di digitalizacion mester bay den fase, pa tur hende por sigui tin acceso na servicio di gobierno na un manera cu nan ta sinti comodo cune. Pero gran parti di mundo, un gran parti di Aruba TA cla y TA desea pa por ricibi cierto documentonan na manera digital. Pa nan sigur mester sigui cu e proceso di “digitalisering” pa nan no mester para den rij mas pa un papel di 5 Florin.
