ORANJESTAD (AAN): Recientemente, a tuma luga reapertura di e facilidad nobo completamente renoba di Enseñansa pa Empleo (EPE) na Playa.
Sigur nos por mira den e ultimo temporada bou liderazgo di Minister Glenbert Croes y directora di EPE Sra. Sabine de Groot un crecemento grandi y interes den e instituto akI, asina Parlamentario di Fraccion di MEP, Alvin Molina a duna di conoce.
Tambe, por mira un aumento den e cantidad di cursonan cu EPE ta brinda y e cantidad di cursitanan cu ta haci uzo di e servicionan cu EPE ta ofrece. EPE ta ofrece curso di formacion y training pa amplia e conocemento y aumenta e oportunidad di e cursistanan.
Enseñansa pa Empleo ta di vital importancia pa Pueblo di Aruba pa esnan cu ta desea di crece den nan trabou of cambia di trabou. Den un economia cu ta creciendo y diversificando ta importante pa e ciudadano sigui recapacita y eleva su conocemento.
Loke cu ta haci mi hopi contento ta e plan pa habri un facilidad di Enseñansa pa Empleo na San Nicolas. E habitantenan pariba di brug lo por sigui curso na San Nicolas mes, esaki sigur lo spaar nan placa y tempo. Preparando nos hendenan pa e oportunidadnan nobo pa nan por asumi e funcionnan aki. Ta bay tin desaroyo na San Nicolas, Minister Glenbert Croes ta negociando e tereno di RDA pa, entre otro, Hydrogen Valley y Eagle LNG.
EPE lo enfoca riba cursonan tecnico y energia. Di otro banda, mi a pidi Minister Glenbert Croes, en conexion cu e desaroyonan di Secrets Hotel pa agrega curso den e area di turismo y hospitalidad. Loke cu tin mester awo ta un edificio pa por aloca EPE, en conexion cu esaki mi ta pidi tur comerciante cu tin un edificio disponibel na San Nicolas, pa tuma contacto cu EPE of Ministerio di Labor pa asina pronto cuminsa sondea e posiblidad pa aloca e prome facilidad di Enseñansa pa Empleo na San Nicolas.
Mi ta urgi ‘private stakeholders’, por ehempel Secrets hotel, Acciona Energia y EAGLE LNG, hasi un compromiso y inversion pa e proyecto aki, Parlamentario Monina a expresa.
