Na salida di 2023 destino ta bolter tur carta riba mesa di Reino
*Con Gobierno Wilders lo atende cu e bom di wega di Statuut??
*Pakico Aruba a wordo confronta cu Caft, LAft, RAft y blackmail?
ORANJESTAD(AAN)—November 2023 a entrega Aruba un desenlace sumamente importante den Reino y central den esaki pues, e Gobiermo di Reino dirigi pa Mark Rutte, cu durante su cuatro Gabinetenan a traha practicamente cu tur partido mas importante pa sosten di votador na Hulanda.
For di momento cu e Gobierno Mark Rutte 3, cu a nace moribundo na 2022 a cay, DIARIO a splica Aruba cu e momento a yega pa hala faha di seguridad mara, den e desaroyonan actual den Reino.
E maneho cu a wordo hiba dor di Gobierno Mark Rutte a laga atras un sabor amargo cerca e Pueblo Hulandes cu a manda e ultimo Gobierno di Rutte cas, na un forma, cu e dirigente nobo di partido VVD y asina heredera politico di Rutte, ta indica cu e partido mester bay hala rosea prome cu e pensa riba participacion den Gobierno.
Pero pa Aruba tambe, e desaroyonan na Hulanda ta marca un momento sumamente importante, cu ta exigi na entrada di 2023, pa Aruba no bira victima di weganan politico cu por backfire pa Aruba mes y deshaci di un momento unico cu Aruba tin, pa confronta Reino Hulandes y mundo cu hechos.
Aruba a bira victima di mal maneho di Gobierno di Reino, cu for di 2010 cu Gobierno Rutte a asumi poder, a deshaci di e proteccion cu Statuut ta entrega na Gobierno di Reino pa proteha Aruba di desastrenan cu un Gobierno por comete.
Den henter historia di Reino, ni Geert Wilders ni otro politico Hulandes of den Reino, por topa cu un situacion den cual Gobierno di Reino tabata alaba Mike Eman como dirigente di Aruba, na momento cu Mike Eman tabata herida Florin di Aruba.
Ora tuma nota di sucesonan entre 2010 y 2014 na Aruba, manera DIARIO ta inventarisa pa entrega na Pueblo di Aruba, por tuma nota con Gobierno di Reino, for di 2009 a permiti Mike Eman, destrui Florin Arubano y e bienestar monetario di Aruba, dor di baha BBO cu mitar sin reemplasa sikiera e areglonan financiero cu a wordo introduci y asina a reemplasa cierto peso di otro belasting prome cu a introduci BBO?
Gobierno di Reino a celebra e Gobierno di Mike Eman, cu a destrui alma di e Ley di Contabilidad, cu ta exigi un Gobierno evita morto di Florin.
Gobierno di Reino por a leza rapportnan di instancianan mas halto den gobernacion di Aruba, cu a bati alarma pa loke Mike Eman a haci, pa asina Mike por a haya mas y mas voto durante gobernacion di Gobierno di Mark Rutte pa na 2013 habri porta pa porfin Rutte dicidi di actua ora ya Florin a muri y a bira evidente cu Reino lo mester a pone placa riba mesa pa e ciudadano Hulandes, cu e Arubiano, sobrebibi un catastrofe monetario.
Diez aña despues cu Mike Eman a haya tur oportunidad pa destrui situacion financiero, Aruba ta hisa e banderanan di tur tipo di supervision cu Reino a permiti pa bira realidad na Aruba, despues cu Reino mes a pone Mike Eman te na top di gobernantenan den Reino.
Como Ministro, prome cu el a baha Mike for di Fort Zoutman, Plasterk tabata uno cu tabata elogia Mike Eman y e maneho cu tabata wordo hiba, manera DIARIO por proba enfrente publico.
Awe Pueblo di Aruba ta wordo confronta cu un serie di abreviacion cu poco hende por comprende. Kico ta LAFT, kico ta CAFT y kico ta RAFT ta exigi expertonan pa splica cualkier hende na mundo!
Pero pa Aruba e tin u significacion. E logro historico di Status Aparte ta wordo afecta. Aruba ta perde loke semper el a lucha pe, pasobra Reino a deshaci di tur advertencia di oposicion di Aruba pa sostene Mike Eman, manera historia ta prueba.
Awe historia ta entrega Prome Ministro saliente Mark Rutte, y Plasterk cu a traha como su Ministro, aunke awor Plasterk mes ta papia di cambio necesario na Hulanda, e deber moral pa splica Aruba pakico Reino no actua for di 2009 contra e anuncionan di Mike Eman, cu entrada na belasting di Aruba lo wordo destrui y Florin di Aruba tabata na peliger y lo mester a wordo salba dor di Reino.
