Parlamentario Misha Raymond a entrega ley di iniciativa pa mucha na presidente di Parlamento

ORANJESTAD (AAN): Diaranzon riba Dia Internacional di Mucha, parlamentario di RAIZ, Misha Raymond a entrega na presidente di Parlamento, un ley di iniciativa pa mucha pa ancra e derechonan di mucha den nos constitucion.

Esaki ta un trayecto cu tabata basta largo y a cuminza cu un idea, despues di cual a formaliza cu diferente conseho, incluyendo consehonan di Universidad di Aruba y Universidad di Leiden, segun Raymond.

El a splica cu e ley ta consisti di diferente articulo, cu e meta pa duna mihor proteccion na nos muchanan.

Segun e parlamentario, tin diferente ley caba cu ta toca derechonan di mucha, pero e importancia di ancra esaki den nos constitucion tin un efecto enorme riba con nos muchanan ta wordo proteha, con decisionnan ta wordo tuma ora ta toca nan y con e debatenan mester tuma lugar ora cu ta trata maneho pa proteccion di nos muchanan.

“Muchanan merece proteccion special door di nan posicion hopi fragil, unda cu nan ta depende di entre otro di nan famia, Gobierno y diferente otro instancia”.

Pesey nan derechonan mester wordo mihor ancra, segun Raymond.

El a splica cu e ley tin diferente articulo, incluyendo esun cu ta defini un mucha como un persona bao di 18 aña.

E articulonan ta inclui pa muchanan no wordo abusa fisicamente, psicologicamente, emocionalmente y muy en particular sexualmente.

“Ta hopi importante pa pone esaki como derecho constitucional, pasobra esaki ta habri tur discusion pa maneho y pa leynan cu mester wordo reforma, pa duna proteccion constitucional na nos muchanan, segun e parlamentario.