“Bay cu ambicion, pero corda semper di unda bo ta bin”
ORANJESTAD (AAN): Den e periodo aki, mas di 300 hoben Arubiano ta prepara pa laga nan cas, famia y isla temporalmente atras pa cuminsa un etapa nobo den nan bida: sigui un estudio superior na Hulanda, Corsou, Merca, Canada of otro pais.
Segun e cifranan mas reciente di Departamento di Enseñansa Aruba, pa aña 2026 un total di 423 peticion a drenta pa Arubalening. Di esakinan, 63 ta di studiante cu lo sigui nan estudio na Aruba, mientras cu 360 peticion ta di studiante cu kier sigui un estudio den exterior.
Parlamentario Jennifer Arends-Reyes ta desea tur e studiantenan cu ta cuminsa e aventura aki hopi exito, perseverancia y sabiduria den e etapa importante di nan bida.
“Bay studia den exterior ta hopi mas cu solamente sigui un opleiding. Ta un paso grandi den bo desaroyo como persona. Bo ta siña bira independiente, tuma decision, maneha bo propio placa, conoce otro cultura y, naturalmente, traha duro pa logra e diploma cu bo a sali Aruba pa busca,” Arends-Reyes a expresa.
E parlamentario ta reconoce cu specialmente e prome lunanan por representa un reto. Laga famia, amigonan, clima y e ambiente familiar di Aruba atras por trece momentonan di soledad y falta di cas. Pero precisamente den e momentonan ey ta importante pa e studiante corda pakico el a cuminsa e caminda.
“Tin dia cu lo bay bon y tin dia cu lo ta dificil. Un mal resultado, un vak cu ta pisa of un periodo cu bo ta sinti falta di cas no kiermen cu bo no por. No laga un mal dia bira un mal aña. Pidi yudansa na tempo, adapta bo strategia y sigui dilanti.”
Conseho pa e prome lunanan
Arends-Reyes ta conseha studiantenan pa organisa nan mes for di principio y no laga administracion, tareanan y fechanan limite acumula. Uza un agenda of calender y establece un rutina cu tin suficiente espacio pa estudio, descanso y diversion por yuda nan mantene un bon balans.
Maneho responsabel di placa tambe ta esencial. E parlamentario ta recomenda traha un presupuesto mensual cu ta inclui huur, cuminda, transporte, seguro, gastonan di scol y gastonan personal. E libertad cu studia afo ta ofrece ta bin tambe cu responsabilidad financiero.
Ademas, e ta encurasha studiantenan pa no tin miedo di pidi yudansa. Si nan no ta compronde un materia, nan por acerca un docente of mentor. Si emocionalmente nan ta pasando den un periodo dificil, ta importante pa busca sosten na tempo. “Pidi yudansa no ta un muestra di debilidad. E ta parti di bira adulto, independiente y responsabel.”
Construi un bon circulo social tambe por haci un diferencia grandi. Arends-Reyes ta recomenda conoce otro studiantenan, participa den actividadnan y evita isola bo mes. Un bon red di amigo y compañero por brinda sosten tanto den momentonan bunita como den periodonan dificil.
E parlamentario ta conseha e hobennan tambe pa disfruta e experiencia, conoce e pais unda nan ta studia y crea recuerdonan, pero semper mantene nan estudio como prioridad. Logra nan diploma mester keda e meta principal.
Keda conecta cu Aruba
Arends-Reyes ta considera importante pa studiantenan mantene contacto cu nan famia y comunidad. Maske nan por ta miles di kilometer leu, nan identidad y hogar ta sigui forma parti di nan.
“Corda cu e conocemento y experiencia cu bo ta adkiri por algun dia contribui na desaroyo di nos isla. Aruba tin mester di hoben prepara, cu vision amplio y cu e deseo pa aporta na futuro di nan pais.”
Departamento di Enseñansa a prepara e studiantenan e aña aki tambe mediante e programa “Let’s Go 2026”. E programa a trata temanan manera planificacion di estudio, liderato y autoestima, transicion pa bida estudiantil, maneho emocional, independencia, presupuesto y preparacion cultural. Pa Arends-Reyes, cada hoben cu ta sigui studia representa un inversion den e Aruba di mañan.
“Mi deseo ta cu nan bay cu curiosidad, disciplina y ambicion. Probecha tur oportunidad cu presenta su mes. Conoce hende, crea un network, siña idioma, haci stage y absorba tur conocemento cu por. No compara bo proceso cu esun di otro hende. Cada studiante tin su propio ritmo y su propio caminda.”
Un palabra pa mayornan y famianan
Finalmente, e parlamentario a dirigi un palabra na e mayornan y famianan cu durante añanan a compaña e hobennan te na e momento di despedida.
“Pa e mayornan, laga un yiu bay studia afo tampoco ta facil. Pero tras di cada studiante cu ta subi avion cu un maleta y hopi soño, tin un famia cu a inverti amor, tempo y sacrificio. E logro di nan yiu ta tambe un tiki e logro di boso.”
Arends-Reyes a conclui cu un mensahe special pa tur e studiantenan cu pronto lo cuminsa e etapa nobo aki:
“Bay cu confianza. Traha duro. No teme di haci fout, pasobra fout tambe ta parti di siña. Crea bo propio oportunidadnan y, ora e caminda bira dificil, corda e meta cu a haci bo cuminsa. Aruba ta orguyoso di boso. Hopi exito, cu Dios guia boso riba e caminda y corda semper: unda cu bo bay, Aruba ta bay cu bo.”
