Gradici cu Minister di Salud cu a pone e documentacion den su man:
- Tin sumanan miyonario envolvi y cu pueblo di Aruba a paga
ORANJESTAD (AAN)-- Jayburtt Dijkhoff, PhD, siguiendo cu su relato tocante e proyecto di renovacion di Hospital Dr. Horacio Oduber, den entrevista cu Matutino DIARIO, a indica cu algun luna pasa caba tabata tin discusion y diferente debate si mester tin un fusion cu Hospital y ImSan y nan bira un solo organizacion.
“Anto a base di esey, mi a haci un pregunta na Minister di Salubridad, si e por divulga si e tin algun clausula den un contract di Pais Aruba, SOGA, Hospital cu ta, berdaderamente, prohibi tin mas hospital na Aruba.
Ta pa hopi aña cu ImSan ta goza di e satisfaccion, no solamente di e comunidad di San Nicolas, pero di Aruba henter. Nan a gana e prestigioso JCI Accreditation; anto, kico ta e problema? Berdad mi no a haya contesta na inicio, y mi a dicidi di entrega un asina yama ‘LOB-verzoek’ cu ta e transparencia di gobernacion”, Dijkhoff a señala.
Dijkhoff a expresa gratitud pa Minister cu el a contest’e, y a mand’e mas cu 200 pagina di documentacion, tocante e contract entre Pais Aruba y Stichting Onroerend Goed Aruba (SOGA).
“Mi ta kere cu ta di aplaudi ora cu un minister ta cumpli cu nos leynan. Mi a pasa door di dje pa pueblo, y mi ta kere cu tipo di cosnan asina aki ta suppose ta di dominio publico, pasobra e placa no a bin di sector priva. E placa ta bin di pueblo. Pueblo a paga pa e renovacion completo di Hospital di Aruba y mi ta kere cu ami, enberdad a haci mi esfuerzo, pa Fundacion SIKI y e pashentnan di Aruba, pero berdad mi ta kere cu a yega e momento pa nos papia over di e situacion”, Jayburtt Dijkhoff a subraya.
El a remarca cu esaki ta, basicamente, e “high-light” di e entrevista aki, unda Dijkhoff a enfatiza cu el a pasa door di e diferente contractnan cu ta papia di sumanan miyonario.
