Parlamentario Gunn ta pidi claridad tocante Rijkswet Aruba financieel toezicht (RAft)

ORANJESTAD (AAN): Den un carta recien manda na Minister Presidente, sra. Evelyna C. Wever-Croes, miembro di Parlamento,

sra. Aquannette A. Gunn, ta pidi claridad riba varios punto tocante e Rijkswet Aruba financieel toezicht (RAft) y e posibilidad cu ta existi pa Aruba por sali for di supervision financiero si nos percura di cumpli cu e condicionnan stipula den articulo 36 di RAft.

            E carta ta pidi Minister Presidente pa comparti un 'overzicht' di e consultanan y palabracionnan concreto cu a tuma luga entre e Minister Presidente di Aruba y e Secretario di Estado di Relacionnan di Reino, sra. Alexandra Van Huffelen. Ademas, e carta ta pidi Minister Presidente pa comparti su postura riba e declaracion cu su Minister di Finansas a haci durante e reunion di 5 di juli ultimo respecto Hulanda.

            Un di e punto crucial den e carta ta cu si Aruba por demostra durante 5 aña consecutivo cu su gastonan ta bahando den e direccion di yega na un BBP di maximo 50% na 2040, esey lo por resulta den e terminacion di e supervision financiero. E carta ta pidi Minister Presidente pa splica den detaye e diferencia di autoridad di Parlamento pa loke ta 'onderlinge regeling' y e RAft.

            Un otro punto di interes ta e tasa di interes cu Aruba lo paga si e bay di acuerdo cu e RAft. Segun declaracion di Minister Presidente, e tasa di interes lo ta 3.5%, mientras cu segun e carta cu e Secretario di Estado, sra. Alexandra van Huffelen, a manda Tweede Kamer, e tasa di interes lo ta entre 6 y 8% si Aruba no bay di acuerdo cu e RAft, pero niun caminda van Huffelen ta stipula e tasa si Aruba bay di acuerdo. Ta importante pa sa cu exactitud si e informacion duna den Parlamento door di e mandatarionan ta berdad. E carta ta pidi Minister Presidente pa splica e declaracionnan contradictorio aki y tambe e discriminacion cu tin pa loke ta e tasa di interes di e islanan CAS. Corsou y St Maarten (cu desde 2010 ta bou di e supervision financiero Rft lo haya un tasa di interes di mas o menos 2%, mientras cu segun Minister Presidente Aruba lo haya 3.5% si aproba e RAft. E parlamentario kier sa, unda e ideologia di partnernan igual den Reino a keda y e kier sa si Minister President a atende e aspecto di trato desigual cu e Secretario di Estado van Huffelen.

            Ademas, e carta ta pidi Minister Presidente pa comparti si Hulanda ta dispuesto di refinancia tur debenan di Aruba riba mercado nacional y internacional na un miho tasa di interes, cual lo haci cu Pais Aruba na un forma structural lo por yega na reduccion di su debenan y yega na e BBP deseabel di maximo 50% di su BBP na 2040.

            E carta ta conclui cu e pregunta si e suma di placa cu Pais Aruba por spaar door di e tasa abou di interes por efectua inversionnan na bienestar general, e.o. den enseñansa y salud publico. E carta ta pidi Minister Presidente pa comparti su punto di bista riba e aspecto aki.

            E carta aki ta representa un intento pa busca transparencia den e maneho di e situacion financiero di Aruba. E ta refleha e preocupacion di e miembro di Parlamento tocante e estado financiero di e pais y e necesidad pa un solucion pronto.