ORANJESTAD (AAN) – Parlamentario Darlaine Guedez-Erasmus a expresa, den conferencia di prensa,
cu Diaranzon di e siman aki, tabata un dia historico unda cu via Tele Aruba a pasa un bunita proyecto pa nos muchanan, unda nan ta wordo educa con pa preveni abuso sexual, pa nan por ta conciente y para pa nan mes.
El a referi na e proyecto “Mi mesun heroe” cu ta pa asina preveni, pa casonan lamentable no sosode den nos comunidad.
Locual ta haci e programa aki hopi special ta cu e ta di mucha pa mucha, unda e muchanan a graba bunita canticanan y storianan, pa asina mira e realidad di e situacionnan cu por presenta, y con pa para fuerte y bisa NO, y no keda keto si algo ta sosode.
Como parlamentario, e ta hopi contento di mira cu e proyecto aki ta den presupuesto 2022 cu Staten a aproba, y cu mas of menos dos pa tres luna pasa gobierno tabata na lanzamento di e proyecto aki, y cu por mira cu enberdad esaki a wordo realiza y cu Diaranzon por a mira su prome episodio.
Guedez-Erasmus a gradici tur e stakeholders cu a tuma nan tempo pa repasa e material aki pa asina constata cu e ta bon pa e muchanan mira. Tambe e ta gradici Minister di Husticia y Asuntonan Social, sr. Rocco Tjon, y Gobierno, cu tambe a mira e prioridad di esaki, ademas di Sichting FIDAC (Fundacion Desaroyo Arte y Cultura) cu tabata asina atento, cu a prepara tur cos, entre otro, Edselyn Figaroa y Lisa Helder, cu a traha masha duro pa haci esaki posible.
Finalmente, el a gradici pueblo di Aruba y e muchanan cu a participa den e serie aki, pa asina graba; y e mayornan cu tambe tabata atento pa hiba nan, tur ora pa asina haci esaki posible.
“Y un danki di curazon, pasobra cu e proyecto aki mi ta sigur cu nos por mira progreso den e situacion aki, cu nos por evita tur sorto di abuso y cu nos muchanan por crece fuerte den nos comunidad, y asina por desaroya bon y asina por bay dilanti den bida”, Parlamentario Darlaine Guedez-Erasmus a bisa pa conclui.
