ORANJESTAD (AAN): Parlamentario Setty Christiaans-Yarzagaray a indica cu el a tuma nota di diferente informacion treci dilanti pa Centraal Bureau voor di Statistiek (CBS).
Esaki durante un conferencia di prensa di fraccion di MEP Diaranzon mainta.
“Mi a tuma nota di e hecho cu CBS ta emitiendo diferente resultado di Censo 2020, cu ta un aña di reto”.
Asina mes nan a logra conta mas o menos 118 mil hende, cu ta un crecemento di 6.6%, compara cu e Censo anterior, segun e parlamentario.
El a splica cu nan no a saca e resultadonan den su totalidad ainda, pero cu e ta felicita e departamento aki cu su trabaonan den e temponan dificil aki.
“E trabaonan di CBS ta importante, pasobra awor mas cu nunca nos mester dirigi nos mes y purba pone un rumbo fiho pa Aruba, pero basa riba informacion, pa determina kico nos kier logra, ki metanan nos kier yega na dje y kico ta e partinan mihor pa tuma decision riba dje”.
Nada di esaki lo por tin un base hopi fuerte, confiable y up to date, cu e parti di Censo, segun Yarzagaray.
