ORANJESTAD (AAN): Grupo San Hudas Tadeo di Dakota ta invita tur devoto na San Hudas Tadeo pa asisti sin falta na e Triduo na honor di San Hudas Tadeo - Santo y Abogado di Asuntonan di Desesperacion,
cual Triduo lo cuminza riba Dialuna 25 di october 2021 pa 6:15 pm y ta sigui asina riba Diamars 26 di october 2021 y Diaranson 27 di october, 2021. E triduo aki lo tuma luga den Misa Birgen di Fatima.
Pues tur devoto na San Hudas Tadeo y Pueblo di Aruba en general ta keda cordialmente invita pa asisti sin falta na e triduo aki, ya cu Hesus mes ta bisa unda cu tin 2 of mas reuni den Su nomber, ey E lo ta memey di nan y nan oracionnan lo worde seguramente scucha.
Fiesta di San Hudas Tadeo, conhuntamente cu San Simon, lo ser celebra Diahuebs 28 di october 2021 cu un Santo Sacrificio di Misa Solemne pa 7’or di anochi.
Nos kier a enfatisa si cu lo tin un Santo Rosario na nos Reina di Santisimo Rosario, nos Mama Maria, como ta luna di October, pa 6:15 pm prome cu e Santo Sacrificio di Misa.
Kier corda pueblo di Aruba cu Santonan ta worde venera y no adora.
Ya ta 59 aña caba (otro aña lo ta 60 aña) cu e Nobena, pero awo Triduo (pa 2 aña) y fiesta na honor di San Hudas Tadeo ta worde celebra na Parokia di Birgen di Fatima, na Dakota. E prome 35 añanan bao direccion di nos defunto keri sra Tula Pablo y for di 1997 e Nobena, awo Triduo, a sigui bao direccion di e debotonan di nos dushi Santo, esta San Hudas Tadeo.
Nan ta desea di reitera: Hesus ta e unico Dios-hende y Mediador di e Aliansa Nobo.
Ta ún Dios so tin y ún mediador entre Dios y nos, esta e hende, Hesucristo (1 Timoteo 2,5), pero mas leu nos ta lesa "Prome cu tur cos mi ta haci un apelacion serio na e kreyentenan pa ofrece suplicanan, oracionnan, intersecionnan y gradicimento na Dios pa tur hende. Mester resa pa esnan cu tin autoridad supremo y pa esnan promenente, ya nos por biba un bida keto y trankil, yen di respet pa Dios y respet pa hende.
Oracion asina ta bon y aceptabel den bista di Dios, nos Salbador, cu kier pa tur hende haya salbacion y yega na conocemento di e berdad: Particularmente nos mester pidi e intercesion di e Cristianan den cielo, cu a haya nan santificacion caba, pasobra: "reconoce anto boso picanan y reza uno pa otro pa boso worde cura. Oracion di hende husto por haci hopi." (Santiago 5, 6)
