Aruba mester busca ayudo cerca instancianan cu tin experiencia y impacto global
ORANJESTAD (AAN): Den un entrevista desde Hulanda, Parlamentario Carlos Bermudez a informa di su reunionnan exitoso cu Unicef diamars ultimo y cu Ombudsman diaranson ultimo.
Durante e reunion cu Unicef Nederland, nan a discuti varios proyecto cu Aruba ya tin andando, y e manera cu Unicef por yuda den desaroyo y fortalecemento di e proyectonan aki. Segun Bermudez, e reunion tabata constructivo y prometedor pa futuro colaboracion.
E Parlamentario a enfatisa cu Aruba, como un pais chikito, mester busca guia y colaboracion cerca instancianan cu tin experiencia y impacto global. Aruba como un pais chikito mester sa pa saca un man y pidi ayudo na Unicef pa proyectonan cu ta andando.
Unicef a duna conseho riba e proyectonan actual y tambe riba prioridad pa futuro. Segun Unicef, Aruba mes por scoge cua proyectonan tin mas urgencia y ta cla pa haya sosten financiero. E organisacion ta dispuesto pa duna un idea mas definitivo riba e suma cu por wordo asigna pa cierto proyecto, dependiendo di necesidad y preparacion.
“Tabata un reunion ameno. Nos a intercambia varios topico y inoficial a conbersa di e plannan di Unicef entre otro con nan ta yega na sumanan y wak con Aruba tambe por haci uzo di fondonan cu ta disponibel cu talvez nos no ta haciendo uzo di nan”, Parlamentario Bermudez a expresa.
