ORANJESTAD (AAN) – Parlamentario Alvin Molina a señala den un entrevista cu DIARIO, cu na Aruba tin hopi comerciante local,
cu kier inverti den e economia di Aruba, cu kier sea cuminza un negoshi of expande un negoshi, trece mas servicio, crea cuponan di trabao, trece bida pariba di brug vooral, y nan ta haci un peticion pero pa cuminza, no ta haya contesta y e tempo stipula pa haye ta sigui bay, y ora e contesta bin, ta bin na mitad, y ora e comerciante bay personalmente, cada bez tin otro cos cu ta stroba.
E ta sigui paso legal bay Huez y ora cu e ta haya su razon, e ta costa Aruba cen. Tin un caso cu a yega dilanti Huez pero tin hopi cas mas cu inversionistanan local, comerciantenan ta gewoon give up.
Molina ta haya esaki hopi lamentable, pasobra e base di un pensamento servicial ta cu ora haci un peticion, e contesta por ta simple, un si of un no, pero e pensamento servicial mester ta un SI, un NO no ta posible. Esaki ta casonan di DIP (Departamento di Infrastructura y Planificacion), pero tin di otro departamentonan gubernamental tambe, ta cuminza cu un NO. “Anto ta na abo pa prueba na ami, di con mi mester tin un SI, abo mester core mi tras, abo mester skirbi 'beroep bezwaard', bo mester busca un abogado, hiba mi huez, pa wak si e ora ey ta bira un “si”, y no mester t’asina”, Alvin Molina a expresa.
El a agrega cu e resultado di un caso por ta “no” pero e manera cu con nan ta trata un peticion ta full otro, si bo cuminza cu e pensamento di “ban wak con nos ta yuda bo”.
Molina ta haya na su lugar pa splica bon e peticionario pakico e contesta ta un no. E no ta pidi algo pa benta afo, sino algo cu e tin pasion pe, cu tin soño pe, cu e kier desaroya pa e mes, pa su famia, pa su pais. Pues mester tuma e peticion aki na serio, duna un contesta na tempo, y si esaki ta negativo splik’e di con, kico falta, y cu kizas e por bira un si ainda.
