Director di Aruba Conservation Foundation, Tyson Lopez:
ORANJESTAD (AAN) – Director di Aruba Conservation Foundation (ACF). Tyson Lopez, siguiendo su entrevista cu DIARIO, a menciona cu ora nan a haya e area di Isla di Oro nan tabata tin bista riba dje solamente como un tereno. Esaki ta caduca otro aña, dia 16 di Februari.
“Y, normalmente, maneho di gobierno ta cu ora un tereno erfpacht caduca, e ta bay automaticamente como un ‘natuur gebied’ y esey a sosode den pasado caba aki den Parke Nacional Arikok, y nos tin e pensamento cu esey tambe lo ta e procedure cu lo pasa akinan”, Lopez a señala.
El a bisa cu nan ta bay lague manera e ta awo como un refugio, y no tin intencion di desaroya e tereno aki cu actividad economico, pero al contrario, lo purba di restaura y stabiliza e Isla, crea un miho habitat pa e especienan cu ta use cu lo ta hopi bon.
Den pasado, usuarionan di e Isla tambe a indica cu kico ta e actividadnan tu nan ta pensa cu ta miho pa e area eki. Tin un zona cu nan a bisa pa no touch cu ne, lague como un criadero di pisca pasobra tin hopi pisca ta broei eynan, y tin turtuga cu tambe ta bin come e yerba di lama eynan, dus e plan ta bira un refugio y esey ta loke ACF ta haciendo aworaki.
El a pone como ehemplo Mangel Halto unda tin hopi actividad y hasta condominium a traha den e area y e naturaleza ta sinti su impacto. Y esey lo purba bringa pa no sosode na Isla di Oro.
E fundacion a pone coralnan artificial nobo p’asina duna e area un extra boost p’e sigui funciona na un miho manera posible.
