Parkeerplaats y choller ta algun di e preocupacionnan mas grandi di comercio den Caya Grandi

ORANJESTAD (AAN):   Durante un presentacion cu a tuma lugar recientemente unda Gobierno a splica kico ta encera e proyecto 'Retrofit

cu tin e meta pa trece un renobacion den Oranjestad, algun comerciante a  hiba palabra y a expresa nan preocupacionnan.

Entre e preocupacionnan aki a menciona e problema cu parkeo. Esaki ta un di e problemanan mas grandi cu nan ta bira pa loke ta atraccion di cliente.

Hopi cliente cu kier bay haci compras den Caya Grandi ta confronta e problema pa haya un lugar pa para nan auto. Esaki ta stroba cu nan por concreta nan intencion di bay den un tienda pa cumpra algun producto.

Mientras cu no ta resolve a problema aki, comercio ta sinti cu no ta atractivo pa e clientenan por bay Oranjestad pa haci nan compras.

Un otro aspecto cu a ser treci dilanti ta e problema cu choller. Esaki ta un situacion cu tin basta aña ta tuma lugar den Centro di Ciudad cu ta afecta comercio, ya sea pa e molester cu algun ta causa como pa e problema cu vandalismo.

Banda di esaki a menciona problema cu e sistema di riolering, cual apesar cu el a wordo renoba e problema no a bay. Caya Grandi ta hole stinki y esaki ta un problema grandi no solamente pa comercio, pero tambe pa e bishitantenan.

A menciona tambe cu tin edificionan abandona cu na lugar di ta un mahos bista, por pensa pa renoba esakinan y haci nan di algo mas productivo pa centro di ciudad. Entre otro a menciona e edificio di ex BonBini Bazaar, La Linda y algun tereno cu ta rond di lugarnan aki.

Por a constata cu tin interes di varios comerciante di desaroya proyectonan den Caya Grandi. E formula cu ta propone pa tin un sinergia entre sector publico y sector priva pa asina por bin cu ideanan cu por funciona den un forma structura den futuro.